Shillong, Risaw 13: Mynta ka sngi 13/Risaw/2026 ka Kabinet ha ka jingialang kala ia kren ia ki hynniew tylli ki mat kiba ka Kabinet kala pdiang ha kane ka jingialang kaba la pynlong mynta ka sngi ia kaba la pyniaid da u myntri rangbah ka jylla u Conrad K. Sangma.
Haba kren ha ki lat pathai khubor hadien ka jingialang ka kabinet u myntri rangbah u la ong ba ha kane ka jingialang kila shim ia ka rai kaba la tip kum ka “Meghalaya School Education Schools Complex Rules, 2026” la iathuh ba ka jylla Meghalaya ka don jan 9244 tylli ki skul.
Ha Meghalaya ki don 9244 tylli ki skul Lower Primary, 2396 ki skul kiba dei ki Upper Primary Schools, ki don tang 1755 skul kiba dei Secondary, bad tang 532 ki skul kiba dei ki Higher Secondary bad kane ka buh ia ka jingeh ha kaba iadei bad ki skul.
Kane ka jingduna kala pynlong ia ki samla pule ba kin nym ioh ban rung klass, kane kala pynlong ia ki samla pule ba kin hap ban thep phom ar lai jaka da kane ka rule kaba thymmai ka long ban pyniasoh ia ki jaka pule naduh ki Lower Primary haduh ki Higher Secondary bad kane ka long tang ia kito ki skul kiba don ban ia treilang.
Kane kan nym ktah ia ka jingpyniaid ia ki skul ka jingthmu ka long ban iarap ia kito ki skul haba don ka jingkiew ha ka jingpule naduh ki klass kiba rit haduh da dep ia ka Higher Secondary bad kane kan iarap ban dang pynbha shuh shuh ia ki jingpule ha baroh ki District.
Kiwei pat ki rai kiba ka Kabinet kala shim ki long, ban pynkylla ia ka Meghalaya Cooperative Society Act 2015, la leh ia kane katkum ka jingbtah ka sorkar pdeng, ha kane ka jingialang la shim ruh ia ka rai ban ithuh noh ia ki 26 ngut kum ki nongtrei sorkar bad kane ka long katkum ka rai jong ka Supreme Court.
Ha kane ka jingialang ka Kabinet kala shim ia ka rai ban pyndamnoh ia ka Mawmluh Cherra Cement Limited bad ka sorkar kala dep siew lut ia kaba dei ban sniew sha ki nongtrei bad ki khajna kum ka Sale Tax kaba la kot sha ka T.8.9/- klur tyngka siew sha ka sorkar bad T.15.5/- klur tyngka kaba dei ka Royalty sha ka DMR, hynrei namar ka jingsiew ka long ha ka sorkar kaba beit ka long ban shu map noh.
Ka Kabinet kala ia kren ruh ia ki sngi shuti na ka bynta u snem 2027 bad ki sngi shuti ki dei ki juh kumba long ha u snem 2026, ka Kabinet kala rai ban pyntrei kam ia ka Meghalaya Micro Small and Medium Enterprises Establishment and Operation Ordinance kane ka long ban pynsuk ha kaba seng kam seng jam.
