Nongstoin, Risaw, 13: U Superintendent ki Police jong ka West Khasi Hills District, u bah H. Kharkongor, u la pyntip ba la don kawei ka ejahar ba la dep ujor ha Mawshynrut Police Station vide Case No. 19(10)2026 ba hap hapoh ka kyndon Sections 64(2)(m)/351(3) jong ka Bharatiya Nyaya Sanhita (BNS), kaba hap ruh hapoh ki kyndon 5(1)/6/15 jong ka ain POCSO Act bad Section 67B jong ka ain Information Technology Act, ha kaba iadei bad kawei ka video ba ka saphriang hapoh ka rynsan social media. Katba ka jingtohkit ka dang iaid mynta shakhmat.
U bah H. Kharkongor u la maham iaki paidbah kiba pyrshang ban pyn saphriang lane sam ia kane ka video, da kaba ong ba lada sam ne buh ia kane ka video, ka jingpyn saphriang ia kane ka video kan lam sha ka jingshah pynshitom da ka bor jong ka ain. Katba ki dkhot paidbah kila shah bthah ban pynsangeh ban pyn saphriang ia kane ka video bad pynduh pyndam noh iaka na ki mobile phone jong ki bad na ki rynsan social media.
U la bynrap da kaba ong ba dei ban iada iaka jingithuh dur iaka lanot, da kaba ong ba lada lap ba don ba pyni dur iaka lanot ba shah thombor ka long rynieng jong ka, kin shah pynshitom katkum ka ain. Ki paidbah kila kyrpad ruh ba ym dei ban pyn saphriang kulmar iaki jingioh jingtip bym dei lane pyn saphriang ia kane ka video, naba leh ia katei, ka lah ban ktah ne pynmynsaw shuh shuh iaka lanot bad pyndkoh iaka jingtohkit kaba dang iaid shakhmat.
Lada don mano mano ba ioh jingtip ha kaba iadei bad kane ka jingjia kin sngewbha ban pyntip sha Police Control Room bad sha kine ki phone nombar, u 9366498499 lane phone sha u 112. Katba ia kito kiba pyntip, yn nym pynpaw iaka kyrteng jong ki.
U la pynthikna ba yn sa pynshitom katkum ka ain pyrshah ia kito kiba pynkhein iaka ain bad kyrpad sha ki paidbah ba kin iatreilang bad ki heh sorkar da kaba sangeh ban pyn saphriang ia kum kine ki jait video ba ktah iaka jingsngew jong kiwei ha ki rynsan social media.
