Shillong, Risaw 14: U Shongknor ka iingdorbar jong ka Khasi Hills Autonomous District Council u bah Strong Pillar Kharjana haba jubad ia ka Point of Order ba la wanrah da u bah Equador Nongrang ia ka jingbymshah ban ia kren ia ka land Bill kaba la pynphai noh da u lat ka jylla sha KHADC, u la ong um lah ban shim tangba mih ha ki kot khubor kan long kaba shisha.
U shongknor ka iing dorbar u la pynshai ba ka jingbymshah jong u ban ia kren ka long namar ba ka ophis kam pat ioh da ka jingthoh dei halor kane ka nongrim ba ia kane ka mat ia kren ka ophis jong u shongknor kam shym la ai lad ban ia kren hapoh ka iing dorbar.
U bah Equador Nongrang mar sien kut ka por jingkylli u la ieng bad wanrah ia ka Point of Order ban kylli ba balei ym shym la shah ban ia kren ia ka Bill kaba la pynphai noh da u lat ka jylla kumba la paw ha ki lat pathai khubor namar kum ki dkhot ka iing dorbar ki don ia ka bynta ban ioh ban ia kren.
Ban kyrshan ia ka jingkren jong u MDC ka Mairang u bah Equador u MDC ka Laban u bah Ricky Shullai u la ong ba katkum ka rule ki dkhot ka iing dorbar ki kwah ban tip namar ki kot khubor haba ki thoh ki da thoh ia ka kyrteng jong u Deputy Chief Minister u bah Prestone Tynsong.
U Chief Executive Member u bah Winston Tony Lyngdoh haba jubab ban pynshai ia ka Point of Order u la ong ba u shongknor ka iing dorbar u la dep ban kren shai ba kam shym pat don kano kano ka jingthoh kaba wan sha ophis te kumta yn ym lah ban shim ba ka dei kaba shisha tangba ka mih ha ki lat pathai khubor.
ka dorbar Tlang jong ka Khasi Hills Autonomous District Council kaba ar sngi kala sdang mynta ka sngi 14/Risaw/2026 bad ka ban kut lashai ka sngi ka 15/Risaw/2026.
