Shillong, Risaw 31: Mynta ka sngi ka Meghalaya Swimming Association kala pynlong ia ka jingiakop jngi kaba shisngi ha Crinoline Swimming Pool Shillong, ki nongwan ia shim bynta kila kot sha ka shispah duna bad kane ka jingiakop ka long naduh ka rta kaba 25 snem haduh 80 snem, hynrei kiba wan ia shim bynta ki don tang haduh 70 snem.
U President ka seng u bah Ian Khongmen haba kren ha ki lat pathai khubor u la ong ba kane ka jingpynlong ia kane ka jingiakop jngi ka dang dei ka sien kaba ar ba ka Meghalaya Swimming Association kala pynlong ia kum kane ka jingiakop jngi bad kiba wan ban ia shim bynta mynta u snem kila kot sha ka shispah duna.
Kane ka jingiakop ka long ban plie ka lad ia kito kiba la rangbah ki bym don ka lat ban leit ban ia kop ha kiwei ki lympung bad kane ka long ban pynshlur hapdeng jong ki rangbah kynthei bad shynrang, ia kum kane ka jingiakop ki pynlong ruh ha ka National Level ruh bad ha kane ka bala dep ki la leit ban ia shim bynta ha Bangalore.
Haba ia dei bad ka jingbym don ia ki jaka jngi kiba 50 meters kum ka seng kala phah ia ki samla sha Assam, kumha Guwahati, Jorhat bad sha bar ruh kumjuh, kane ka jaka kaba ki pynlong mynta ka dei kaba 25 meters bad ka dei ka jaka ban jngi paidbah bad ki pyndon kam ia kane da ka jingkyrshan ka tnad ialehkai ka sorkar jylla.
U President ka MSA la ong ba ka don hi ka jingeh hynrei ki hikai jngi ha kane ka jaka bad ki phah ruh sha bar lyngba ka skhim kaba la ioh na ka sorkar kaba la tip kum ka “Team Preparation Scheme” kila dang kham tbit shuh bad ha ka jingialehkai Khelo India na ka bynta ki riewlum kila jop bad ha Assam ruh kila ia jop ha kaba kila ioh saw tylli ki takma.
La iathuh ruh ba na ka liang jong ka sorkar jylla kala shna mynta ia ka jaka jngi kaba 50 meters ha Umsawli bad ka jingtrei ka dang iaid sha khmat bad khmih lynti ba ynlah ban pyndep ia kane ka jingshna ha u bnai Lber 2027 kan long ka jingkyrkhu iaki samla kiba don sap ha ka kam jngi.
La iathuh ba mynta kila sdang ia ka jinghikai kaba ia dei bad ka “Diving” ka ka jingryngkoh na jrong shapoh pung, ha Meghalaya ka jaka ba don ia ka ne ka jaka ban hikai Diving ka dei tang ka Crinoline bad mynta ki dang phah ia ki samla ban hikai sha Assam.
