Shillong, Risaw 31: Mynta ka sngi u Myntri rangbah ka jylla, u Conrad K. Sangma u la ialam iaki nongialam ka KSU ban iakynduh ia u Myntri sorkar pdeng ba dei peit iaka tnad ka koit ka khiah, u Jagat Prakash Nanda ha nongbah Delhi ban iakren haba iadei bad ki jingeh kiba don ha NEIGHRIMS.
Ha kane ka jingleit iakynduh ia u Myntri ka sorkar pdeng, ki nongialam ka KSU ki long u samla Raymond Kharjana, ba dei u President, u samla Reuben Najiar, uba dei u General Secretary, u samla Pynshaiborlang Rani, u symbud General Secretary bad u samla Hopefullborn L. Mawnai, uba dei u Assistant Finance Secretary.
Hadien ka jingiakynduh ia u Myntri ka tnad ka koit ka khiah ka sorkar pdeng u samla Raymond haba kren ha ki lad pathai khubor u la ong ba ka seng kala pynlong iaka jingiakhih ha u snem ba la dep bad mynta ka sngi la ioh ban pynsngew iaki jingeh hakhmat u Myntri ka sorkar pdeng iaki khyndai tylli ki mat.
Na ki khyndai tylli ki mat ha kane ka jingiakynduh kila iakren bniah ha kaba iadei bad ka jingthung kam iaki nurse kaba ka seng ka dawa ka dei ban long 80% iaki kynthei bad 20% iaki shynrang bad la iakren ba ha ka bhah thung kam ka dei ban kham ai jingmyntoi iaki trai jylla.
U President ka KSU u la ong ba ka jingiakynduh ka long kaba sngewtynnad ha kaba u Myntri ka sorkar pdeng u la shah skhor bad u la sngewthuh iaki mat jingdawa bad 27 bad 28 tarik Risaw kila iakren ha ka jingialang bah ka NEIGHRIMS bad u Myntri u la kular ban pynbeit ia kine ki kynrum kynram hapoh ka shi bnai.
Kum ka seng ka sngew ba ka sorkar jylla kala pyrshang bad ka dei ban iai pyrshang ban buddien khnang ba ki mat kiba ka seng ka dawa kan iaid beit iaid ryntih, haba iadei bad ka thung kam thung jam u Myntri ka sorkar pdeng u la ong katba ym pat lah ban pynbeit iaki kynrum kynram, ym pat lah ban pyniaid shakhmat iaka jingthung kam haba iadei bad kane kan sa don ka komiti kaban peit ia kane.
Ha kane ka jingiakynduh ka seng kala dawa ban kyntiew kyrdan noh iaka NEIGHRIMS sha ka kyrdan Institute of National Importance ha kaba kane ka wanrah iaka jingsuk ban pyniaid beit pyniaid ryntih ban pynbeit iaki kynrum kynram.
