Shillong, Risaw 30: Kane ka dei ka shithi na ka liang jong ka Joint Secretary ka tnad jngohkai pyrthei, ka kong C.S.Khongwir sha ka ophis jong u Secretary ka Executive Committee, Khasi Hills Autonomous District Council, Shillong, kaba dei shaphang ka jingkhang dam iaka jaka ba dei ban shna iaka Lower Terminal Point jong ka Shillong Peak Ropeway Project ha Madan Laban kala long kawei na ki mat kiba la mih ha ka 27/Risaw/2026 hapdeng ka sorkar jylla bad ka Khasi Hills Autonomous District Council (KHADC) bad ka jingkurup iaka mar ha ka 27/Risaw/2026 bad ka jingdawa ban plie biang iaki muhor bad ban khynra noh iaka jingkurup.
Kala thoh ia katei ka shithi ha ka kyrteng jong ka sorkar Meghalaya bad ka Meghalaya Ropeway Development Authority (“ka Bor Synshar/Authority”), kiba dei ki “Promoters” ne ki nongpynaid bad nongkyntiew iaki kam katkum ka jingmut jong ka Section 2(q)(i) bad (ii) jong ka ain Meghalaya Ropeway Act, 2022 halor ka lynnong kaba iadei bad ka Shillong Peak Ropeway Project.
La ong ba ha ka 27/Risaw/2026, dei ha ka por hapdeng ka 10:30 baje mynstep bad 12:00 baje mynsngi ki ophisar jong ka Enforcement Wing jong ka Khasi Hills Autonomous District Council, ba la lam khmat da u bah Kordor Synrem, Inspector kila ia rung jubor ha ka bynta ba shapoh jong katei ka jaka ha Madan Laban.
Kila shu beh krad iaki nongtrei katei ka jaka, buh iaki tala bad ki muhor jain ha ki jingkhang jong ka ophis, kila pynkhreh da ki jingthoh ban khynra bad kila shim iaki Zima namas ba mut ki kot skim jamin na ki nongkhmih jaka treikam jong ka kompany ba pyniaid iaka kam, ka M/s KEC-TCL (JV).
Ia kane ka jingkhynra bad ki skim jamin kila ong ba la shim ia kane hapoh ka kyndon jong ka Section 7A ka United Khasi-Jaintia Hills District Regulation, 1954, ha kaba la ong ba ka kila pynkhein iaka kyndon Section 3 jong ka Regulation.
Kane ka projek ka dei ka kam pynroi na ka bynta ki kam paidbah ka sorkar jylla, kaba dei ba pyntreikam da ka bor pyniaid kum ka kynhun pynbeit ba kongsan jong ka sorkar jylla kaba hap hapoh ka Section 3(1) jong ka Ain Ropeway (Ropeway Act).
Katba iaka jingioh jingbit na ka bynta ban pyndonkam ia kane ka jaka khlaw ba don 2.3257 hektar ha Riat Laban Reserve Forest bad ka Riat Laban Forest na ka bynta kane ka projek, la pdiang da ka kynhun ba dei peit iaka mariang, ka khlaw bad ka jinglong jingman ka suinbneng.
Katba ha ka 24/Risaw/2026, ka kompany M/s KEC-TCL (JV) kala pyntreilang iaka kam hapoh ka jingpeit jong ki bor pyniaid jong ki nongpyniaid kam, ka kompany M/s KEC-TCL (JV) ka dei ka kontraktor kaba la thung da ka tnad jngoh kai pyrthei, kaba la dep aplai iaka trading licence ha ka 18/Jymmang/2026 hadien ba kala ioh iaka NOC na ka Riat Laban Dorbar Pyllun bad ba katei ka trading licence ka dang don bad ka KHADC.
La bynrap ba haapoh ka Section 30 (2) jong ka Meghalaya Ropeway Act, 2022 kaba ai lad ia u Promoter ban pynlong iaki kam pynkhreh kynthup ia kaba pynmih tender bad pynrung iaki kontraktor, hynrei u dei ban ioh iaka license hapoh kane ka section shuwa ban sdang iaka kam shna ia katei ka ropeway.
Ka kam pynkhreh kumba la kdew shakhmat kam dei ka kam khaii, namar kata ka jingdon iaka trading license ha kane ka por kam donkam bad kumta ka jaka kaba la pynkhreh ban treikam ka dei jong ka sorkar jylla.
Ha kane ka shithi ka kong Khongwir kala kyrpad ba dei ban weng mar mar iaki tala ba khang da ka muhor jain ha ka jaka ba jing ka Lower Terminal Point bad ka jaka jong ka ophis ha Madan Laban, weng noh iaka jingkurup kumba kala jia ha ka 27/Risaw/2026 bad iaki skim jamin bad pynphai noh ia baroh ki mar ba la kurup bad dei ban pynshisha da ka jingthoh ba kan ym don shuh ka sienjam ba kin shim hapoh ka Kyndon pyrshah iaka sorkar jylla, ka bor synshar ne ka kynhun kaba pyntreikam halor kane ka projek.
Lada ym trei ia kane mardor, ka sorkar kan hap ban shim iaki sienjam kat kum ka ain, lyngba ki bor ba dei peit, ban pynkynriah noh iaka jingpynthut bad ban iada iaka jaka lem bad ki kam jong ka Project. Phin kit khlieh ia kino kino ki jingmih, kynthup iaka jingsiew bad ka jingslem jong ka projek.
Ia kane ka shithi la pynmih khlem da ktah ne pynduh iaki hok bad ki jingkam jong ka sorkar jylla bad ka bor synshar, kynthup iaka ejahar kaba la ujor ha Laban Police Station ha ka 27/Risaw/2026. Kane ka pynmih ryngkat ka jingmynjur jong ka bor ba dei peit bad ka tnad ain.
