Shillong, Risaw 30: Mynta ka sngi 30/Risaw/2026 ka Khasi Hills Autonomous District Council kala rakhe ia ka lyngkhuh snem kaba 75 naduh ba la plie ia ka ha Dinam Hall Jaiaw ha u snem 1952 hapoh ka khyrngit kaba hynriew jong ka riti synshar ka Ri India, ia kane ka jingrakhe la pynlong ha phyllaw jong ka ophis.
Haba kren ha kane ka jingrakhe u Chief Executive Member u bah Winston Tony Lyngdoh u la ong ba ha kane ka jingdap 75 snem ka KHADC ka long ban ai burom ia ka khana pateng, ia ka jinglong kyrpang, ka jinglen ialade ka jingkitkhlieh bad ka mynsiem kaba iaineh jong ka jaitbynriew Khasi.
U CEM u la ong ba dei ban pdiang bad ban burom ia kito ki nongialam kiba pynieng ia u paia u baskhem ba ka long kumba ka long mynta dei namar ka sien jam jong ki rangbah ba kila shim da ka jinglong rangbah bad jinglong radbah ka jong ki kaba iada ia ka lawei.
La ong ha kine ki 75 snem ka KHADC kala ioh ban mad ia shibun ia ka jingwan ka jingmih jong ki nongmihkhmat jong ki nongialam na kiba bun ki seng sain pyrthei, kila don shibun ki Executive Committee kiba la ialam khmat ia ka District Council bad kila mad ruh ia shibun ki jingeh hynrei ha kine ki jingkylla ym shym la shah rong noh namar ka kamram ka dei kajuh bad kane ka EC kaba mynta ka dang ialeh hi ban trei shitom.
U nongialam ka liang pyrshah u bah Titosstarwell Chyne haba kren ha kane ka jingrakhe ia ka jingdap 75 snem ka KHADC u la ong ba kane ka sngi ka dei ban long ka sngi ban kyrsiew thiah, ka sngi ban pynkynmaw ia ki jingmut jingpyrkhat balei ba donkam ban pynneh ia ka District Council.
U la ong ba dei u Rev. JJM Nichols Roy u ba la iohi jngai ba kum ka jait bynriew barit paid kan jia aiu ia ka jait bynriew kaba rit kaba tang shi troh lada pyniasoh bad ka Ri India kaba iar bad une u rangbah u la iohi ia ka jinglong ba kyrpang bad kumba ka long mynta la lah ban pynneh pynsah ia ki riti dustur, ka synshar bad ka bishar.
Ha kane ka sngi la ioh ruh ia ka jingkren na u shongknor ka iing dorbar u bah Strong Pillar Kharjana ha kane ka sngi la don ki riew rangbah kiba la shah khot kyrpang ka jingdon lang ki nongtrei bad la pynphuh pynphieng da ka shad mastieh kaba dei ka shad tynrai u khun Khasi Khara.
