Shillong, Risaw 29: U Myntri rangbah ka jylla u Conrad K. Sangma ha ba kren ha ka jingrakhe ia ka jubilee ksiar jong ka East Garo Hills District kaba la pynlong ha Rongrenggre Govt Higher Secondary School, u la ong ba ka sor Williamnagar kala kiew ha kiba bun ki liang ka pule puthi bad ka ioh ka kot namar ka dei ka pdeng jong ka District.
Haba ai khublei ia ki bor pyniaid jong ka District u la pynkynmaw ia ka jingnoh syniang ki riewkhraw kum u Capt.Willliamson A. Sangma, u Choronsing A. Sangma, Lolith R. Sangma bad Rev M. Marak kiba la pynioh ia ka East Garo Hills District.
Ha kane ka sngi la ai khublei ia ki nokmas, kynthup ia u Tiren Sangma, u Chingban Sangma, u Asin Marak, u Dingnang Sangma, u Mison Sangma kiba la ai jaka sha ka sorkar ban tei ia ki ophis treikam ka sorkar.
Ha kane ka sngi u myntri rangbah ka jylla u la plie ia ka Williamnagar Higher Secondary School ha kaba u la ia kren bad ki nonghikai ki khynnah skul, ha kane ka juh ka sngi u la leit ban jurip ia ka Multi-Purpose Indoor Sports Hall kaba dang shna mynta kaba la kot sha ka T.9.40/- klur tyngka.
La ong ba kane ka jingdap sanphew snem ka district kala plie ki lad ha kiba bun ki bynta ha kaba la plie ia ki surok, buh maw nongrim ban shna ia ki iing sorkar bad ia ka iing jong ki pulit kiba dei na 5th Battalion kaba don ha Samanda.
Shuwa ban kyntiew kyrdan sha ka district ha ka 26/Kyllalyngkot/1972, la plie ia ka Simsanggre Civil Sub-Division bad dei ha u bnai Risaw 1976 la kyntiew sha ka District bad la jer Kyrteng ia ka nongbah ka East Garo Hills District ha ka kyrteng u myntri rangbah ba nyngkong ka jylla.
Ha kane ka sngi la don ruh u MLA kane ka jaka u Marcuise N. Marak, myntri sorkar u Deputy Commissioner, Superintendent of Police, East Garo Hills, ki heh sorkar, ki MDC, ki Nokmas, ki nongialam niam, ki nonghikai bad ki khynnah skul.
