Shillong, Naiwieng 03: Da ka jingsngewkmen bad ka jingsngewnguh ïa U Blei, ka KJP Assembly lyngba ka Mission and Evangelism ka don ban pyntip sha phi baroh ba kan pynlong ïa ka Gospel Concert kaba heh, kaba la ai kyrteng “Maverick City Music Live in Shillong,” ha ka 12 tarik u Nohprah, 2026, ha Madan Polo, Shillong.
Ïa kane ka concert la pynlong da ka KJP Assembly ryngkat ka jingkyrshan jong ka sorkar Meghalaya, ka jingpynlong ia kane programme (event) ym tang na ka bynta ka prokram rwai Gospel kaba kyrpang ha kane ka aiom Khristmas, hynrei khamtam eh ban pynmih fund na ka bynta ban kyrshan ïa ki project bapher bapher jong ka KJP Assembly kiba kyntiew ïa ka imlang sahlang bad ka bha ka miat jong ki briew ha ka jylla jong ngi.
Ka Maverick City Music ka dei ka kynhun nongrwai Gospel kaba pawnam na Atlanta, Georgia, USA, kaba la paw nam bha ha ki bynta bapher bapher jong ka pyrthei lyngba ki jingrwai mane bad jingïaroh ïa U Blei.
Kane ka long ka lad ban sakhi ia kine ki nongrwai Gospel na shabar ri hapoh kane jylla hadien ki nongrwai bad ki kynhun Gospel kiba la paw ha ki por mynshwa, kum u Bob Fitts, ka kynhun tem Petra bad u Don Moen, mynta ngi don ïa ka kabu ban sakhi live sa shsisien ia kane ka kynhun nongtem nongput kaba pawnam jong ka pyrthei ka Maverick City Music.
Ngi ngeit ba kane ka concert kan long ka kabu kaba kyrpang ïa ki paidbah ban ïashim bynta ha ka jingïaroh ïa U Blei lyngba ka jingrwai bad kumjuh ruh ia ka sap rwai sap tem jong kine ki nongrwai.
Ngi kwah ban pynshai ba ka jingthmu jong kane ka concert kadei kum shibynta na ka jingpynkhreh ka jong ngi ia kane ka aiom Khristmas bad ruh ban kyntiew ia ka sap ka phong jong ki khun ka jylla ka jong ngi ha ka tem ka put khristan. Kawei pat ka jingthmu kaba kongsan ka long ban pynmih Fund na ka bynta ban kyrshan ïa ki kam bad ki project jong ka KJP Assembly kiba shakri ïa ka imlang sahlang.
Ka KJP Assembly ka don ïa ki project bapher bapher kiba trei na ka bynta ka jingbha jong ki briew, kynthup ïa ki kam jingïarap ïa kiba donkam jingïarap, ki kam pule puthi, ka jingsumar bad jingïarap ha ka liang ka koit ka khiah, bad kiwei pat ki kam kiba thmu ban wanrah ïa ka jingkylla kaba bha ha ka imlang sahlang.
Kumta, lyngba kane ka concert, ngi khot ïa baroh ban ïatreilang bad ban kyrshan ïa kane ka jingthmu kaba bha. Ka Fund kaba mih na kane ka prokram kan ïarap ban pynkhlaiñ ïa ki projects jong ka KJP Assembly kiba noh synniang ban kyntiew ia ka longbriew man kaba khiah krat.
Ka dor tiket bad ka rukom thied na ka bynta ban pynsuk ïa baroh kiba kwah ban wan shim bynta bad sakhi ïa kane ka concert, la buh ïa ki dor tiket, kaba ₹1,000,₹1,500,₹2,500
Ki paidbah ki lah ban thied ïa ki tiket jong phi online lyngba ka ROCKSKI TICKETS.COM. Ngi kyntu ïa baroh kiba kwah ban wan sha kane ka event kin pynthikna ialade ban thied lypa ïa ki tiket jong phi lyngba kane ka rynsan online.
Na ka bynta ki donors kiba donate Rs 5000/- sha neng, yn ai lang ruh bad ka certificate signed ban soi da ki artist. Lyngba kane ka lad, ngi iawer, ngi khot sngewbha, ngi kyrpad bad kyntu ïa baroh ki nongshong shnong jong ka jylla Meghalaya bad ïa kiba na shabar jong ka jylla ruh ban wan sakhi bad ïashim bynta ha kane ka Pre-Christmas Gospel Concert.
Ka jingwan shim bynta ka jongphi sha kane ka Gospel concert ka long ruh ban ai ka jingkyrshan ïa ki project jong ka KJP Assembly kiba ai jingmyntoi ïa ka imlang sahlang.
Ngi kyrpad ruh ïa ki Balang, ki pastor, ki nongïalam Balang ban kyntu ia ki khun ka Balang, ki samla, ki longkmie, ki longkpa ban ïashim bynta ha kane ka prokram. Ngi kyrmen ba kane ka concert kan long kaba jop da ka jingkyrshan jong phi bad phin nym babe haba phi wan sha kane ka gospel concert phin mad ia ki jingkyrkhu ha ka jingim.
Ha kaba pynkut, na ka bynta ka KJP Assembly, ngi ai khublei ïa ki lad pathai khubor kiba la ai por ban wan sha kane ka press conference bad kiba ïarap ban pynsaphriang ïa kane ka khubor sha ki paidbah.
Ngi kyrpad ïa phi ban ïarap ban pynbna ïa kane ka Gospel Concert, khnang ba ka khubor kan poi sha kiba bun ki briew, hapoh bad shabar jong ka jylla. Kane ka long katkum ka kyrwoh bala phah da u Rev. S.Diengngan Administrative Secretary KJP Assembly.
