Shillong, Naiwieng 03: Mynta ka sngi 03/Naiwieng/2026 ki shiphew tylli ki seng bhalang kaba kynthup ia ka FKJGP, HNYF, RBYF, JSU, GSU, AYWO, ADE, FAF, AAYWS, AHAM, kine baroh shiphew tylli ki seng kila thaw ia ka joint Co-Ordination Committee kila leit ban ia kynduh ia u myntri rangbah ka jylla u Conrad K. Sangma halor kawei ka phang kata ka long haba iadei bad ka jingwan rung ki briew kiba nabar sha kane ka jylla.
Ha kane ka jingiakynduh ba mynta ka sngi ka long ba kine ki shiphew tylli seng ki kwah ban ia kren bad ka sorkar halor ki mat kiba kila ai ha u snem 2013-2014 sha ka sorkar Meghalaya bad ha kane ka jingthoh kila pynpaw ia ka jingsngewdiaw namar ba ym shym la pyntreikam ia ki ain ban iada na ka jingwan kyrthep ki briew kiba nabar.
Ha kane ka jingthoh kaba kila ai ha u myntri rangbah ka jylla kila buh ia ka jingkylli bad ka jingpan ia ka jingpynshai ba balei ym shym la lah ban pyntreikam pura ia ka ain Meghalaya Resident Safety and Security Act 2016 shaei ki jah ki jaka rung jaka mih bad la jia aiu ia ka Meghalaya Identification Registration Safety and Security Migrants Workers Act, kila kren ruh haba iadei bad u pud u sam bad ka Meghalaya Benamy Transaction Prohibition and Detection Act.
Ha kane ka jingthoh kila kren ba kitei ki ain ka long ban iada ia ki riewlum na ka jingshah klun ha ki briew kiba nabar la ka long na kiwei ki jylla ne na kiwei ki ri bad la kynnoh ba ka sokar kam don ia ka mon ban pyntreikam la ka long ha Khasi Hills ne Garo Hills ruh kumjuh bad kine ki shiphew seng kila ai por ia ka sorkar lai phewsngi ban pyntreikam ia kine ki ain lym kumta kin pynlong da ka jingiakhih.
U bah Dundee Cliff Khongsit President ka FKJGP haba kren ha ki lat pathai khubor hadien ba la dep ban iakynduh bad u myntri rangbah ka jylla u la ong ba ka jingiakynduh jong ki ka long ban ia kren halor ki mat bapher bapher kiba ki seng bhalang kila buh ha khmat ka sorkar naduh u snem 2014 khamtam eh haba iadei bad ka Inner Line Permit, ka MRSSA namar ba ki sah ha ka um dum ym don ba pynshai.
Ha kane ka jingiakynduh na ka liang u myntri rangbah ka jylla u la ong ba ka sorkar ka dang peit bniah bad ha kajuh ka por ka JACC kala ai por ia ka sorkar 30 sngi ba kan jubab bad khamtam haba iadei bad ka MRSSA i kumba ka pynsuki na ka liang ka sorkar wat la ka ain la dep ban pynlong naduh u snem 2016 haba iadei bad kane ka ain u myntri rangbah u ong ba ki wanrah ia ka jingpynkylla namar kam don ia kita ki kyndon ba ym lah ban kem ia u briew ne ka briew bad u myntri rangbah u la ong ba un sa ia kynduh mynta u bnai bad ka kynhun ban ia kren kham bniah halor kine ki mat.
