Shillong, Naiweng 08: u Bah Donboklang ThabahPublicity Secretary ka Seng Samla Kur Thabah Sengkmie ki pynpaw ïa ka jingsngewsih kaba khraw bad kaba jylliew halor ka jingduh noh ïa ka Samla Rachellien Thabah, kawei na ki samla jong ka Kur Thabah, ha kane ka jingjia kaba sngewsih bad kaba pynkhuslai ïa kiba bun.
Katkum ka jingujor jong ka kmie,ka Samla Rachelline Thabah kala mih na la ïing ha ka 29 tarik Risaw 2026 ban leit sha Guwahati ban ïa shim bynta ha kawei ka prokram, bad kala pyntip ba ka thmu ban wanphai ha ka 1 tarik Naiwieng 2026.
Hynrei, ha ka step jong ka 1 tarik Naiwieng, ha ka por kumba 3:30 baje mynstep, ka kmie ka la ïoh jingtip ba ka khun jong kala mynsaw jur na ka jingshahthang ha kawei ka ïing ha thaiñ Mawlong, ha kaba kala leit sah bad uwei u briew. Hadien kane, la pynkit ïa ka sha NEIGRIHMS Hospital ban ïoh jingsumar.
Ka long kaba sngewsih shisha ban tip ba ka jingim jong ka kala kut noh ha kum kane ka rukom, kaba la wanrah ïa ka jingsngewsih kaba khraw ym tang ïa ka ïing ka sem hynrei ïa ka Kur Thabah hi baroh kawei.
Kum ka seng kur ka pynrem jur ïa kano kano ka jingleh donbor, ka jingshah pynmynsaw bad ki kam kiba long pyrshah ïa ka hok bad ka jingim jong ki briew. Ym don mano mano ruh ba dei ban duh noh ïa la ka jingim na ka daw jong ka jingleh jong kiwei.
Na kane ka daw, ki kum ka Seng Samla Kur Thabah Sengkmie, ki kyrpad jur ïa ki bor pynïaid aiñ bad ki tnat pulit ba kin pynlong ïa ka jingtohkit kaba bniah, kaba laitluid bad kaba khlem shah liang, khnang ba yn lah ban lap ïa ka jingshisha baroh halor kane ka jingjia.
Ki kwah ba kino kino kiba donkti, lada lap ïa ki, kin shah pynngat ha ki kyndon aiñ katkum ka jinglong jong ka kam. ki kyrpad ruh ba ka jingbishar kan long kaba hok bad kaba shai, khnang ba ka hok jong ka Rachel bad jong ka ïing ka sem jong kan ym shah ñiew beiñ.
Ha kajuh ka por, kum ka Seng Samla ki kwah ban ai ïa ka jingkyntu kaba kyrpang sha baroh ki samla jong ka Kur Thabah, khamtam eh ïa kito kiba leit jingleit shabar, kiba trei bad kiba sah shabar jong ka Jylla, ba kin long kiba husiar ha ka jingïadei bad ki briew kiba nabar jylla. Ki kyntu ïa ki samla ba kin tip bniah ïa ki briew kiba ki ïadei, kiba ki shaniah bad kiba ki sah lang, namar ka jingshngaiñ jong ka jingim ka long kaba kongsan tam.
Kum ka kur ki kwah ban pynshai ba kane ka jingkyntu kam mut ban pynjah burom ïa kano kano ka jaitbynriew ne ban kynnoh ïa baroh ki briew kiba nabar jylla, hynrei ka long tang ka jingpynkynmaw ïa ki samla ba kin long kiba phikir, kiba stad ban bishar bad kiba ym dei ban shaniah kyrkieh ha ki briew khlem da tip bniah ïa ki.
Ka jingim jong uwei pa uwei na ki samla ka long kaba kordor shibun. Ki kmie ki kpa bad ki bahaïing hasem ki don ïa ka jingkyrmen bad ka jingangnud kaba khraw ïa ki khun jong ki. Kumta, ngi kyntu ïa ki samla baroh ba kin shimkhia ïa la ka jingshngaiñ, ban ïada ïa lade bad ban ïarap mar kylliang haba don kino kino ki jingeh.
Ha kane ka por kaba dap da ka jingsngewsih, ngi phah ïa ka jingsngewlem kaba jylliew sha ki kmie ki kpa, ki bahaïing hasem bad baroh kiba la mad ïa kane ka jingduhnong kaba khraw. Ngi duwai ba U Blei Un ai ka bor, ka jingshlur bad ka jingsuk mynsiem ïa ki ha kane ka por kaba eh.
Ka jingim jong I Rachel ka long kaba kordor. Ngi kyrmen ba ka jingshisha kan mih shai bad ba ka jingbishar hok kan urlong, kane ka long katkum ka kyrwoh kaba la phah da u bah Donboklang Thabah Publicity Secretary Seng Samla Kur Thabah Sengkmie.
