Shillong, Naiwieng 07: Ka Meghalaya Bharat Scouts and Guides (BSG) kala dep rakhe iaka sngi jong ka lem bad ka Rajya Puraskar Rally 2026 ha Lok Bhavan, Shillong, ha ka sngi saitjain, ha ka jingiadon lang u Lat ka jylla Meghalaya, u C.H. Vijayashankar uba la pynbna ban iarap pisa haduh T. 2 lak man u snem na ka ophis jong u na ka bynta ban kyrshan iaka rukom shakri ha kane ka jylla.
U Lat, uba dei u nongkyrshan jong ka Meghalaya Bharat Scouts and Guides, u la dep pynbna ia kane ha ka jingialang paidbah, kaba la sngewnguh hangne iaka jingnohsynniang ka seng halor ka jingpynroi iaki samla bad ka bynta ka jong ka ban kyntiew bad pynsan iaki nongshong shnong kiba kitkhia, lyngba ki nongrim jong ka jinglong ryntih, ka jingialam lynti, ka jingieng ha la ki jong ki kjat, ka jingshakri bad ka jingiatylli ka ri.
U la pynkynmaw ba naduh ba la seng iaka, ka kynhun Bharat Scouts and Guides kala pyni iaka bynta bakhraw ban pynshong nongrim ia kine ki riti synshar hapdeng ki samla bad ban pynkhreh iaki ban ai ki synniang ba donkam iaka imlang sahlang.
U Vijayashankar u la ai jingiaroh iaka Meghalaya Bharat Scouts and Guides na ka bynta jong ka jingpyn long iaki prokram bapher bapher, jinghikai bad kiwei kiwei ki rukom jingshakri kiba la dep pynlong ha kylleng kylleng ka jylla.
U la kren shaphang ka National Level Tribal Meet kaba la dep pynlong ha kane ka nongbah Shillong ha u snem 2026 kum kawei na ki bynta ba kongsan kaba ai ka lad kabu ksiar na ka bynta ban iakynduh bad ban ia sngewthuh kham bha iwei ia iwei pat hapdeng ki samla.
U la ai khublei iaka Guide Unit jong ka KJP Girls Higher Secondary School halor ka jing ithuh iaka kum ka Historical Unit jong ka BSG ha ka por ba rakhe iaka jingdap 60 snem jong ka, kaba long ruh kawei na ki jingnoh synniang ba la slem jong ka sha ka Scouts and Guides ha ka jylla Meghalaya.
Haba ithuh ia ki jingdonkam baroh ha ka liang ka pisa ban pyniaid iaka seng bad ban pynlong iaki kam jong ka, u Lat u la ong ba ki lad jingiarap kiba biang ki long kiba donkam tam na ka bynta ka jingtreikam kaba biang jong kino kino ki bynta jong ka pule puthi.
U la pynbna ba ka ophis u Lat kan sa ai iaka bai iarap man u snem kaba T. 2 lak sha ka Meghalaya Bharat Scouts and Guides ban pynkhlain iaki prokram bad ki kam jong ka.
Ka bynta jong ka jingrakhe, u Lat u la pyllait iaki sticker lama BSG bad u la sam iaki syrnod sha baroh 241 ngut ki nongioh iaka khusnam Rajya Puraskar kaba donnam. Kine ki nongioh khusnam ki kynthup ia 77 ngut ki Scout, lai ngut ki Rover bad 161 ngut ki Guide.
Haba ai khublei iaki nongioh khusnam, u Lat u la pynshlur iaki Scout bad Guides namar ban bat pyrkhing ia ki jutang bad ki nongrim jong ka kynhun bad ban bteng ban pynneh iaki thong jong ka. U la pynpaw ka jingkyrmen ba kin nangsan ban kylla long ki nongshong shnong ba kitkhia bad ban synniang sha ka jingtei iaka Meghalaya bad ka India kaba shongsuk, kaba tylli bad kaba nang roi.
