Shillong, Rymphang 26: Ka Khasi Students Union ha ka Central Executive Committee kaba long hynne ka sngi Balang ka la pynpaw iaka jingbynnud kaba khraw halor ka jingleit pyniasoh HNLC u Vice President ka Seng, u samla Frederick Kharmawphlang.
Haba kren bad ki lad pathai khubor ha ophis treikam jong ka KSU, u President ka Seng, Bah Daniel Khyriem u la ong ba watla ka Seng ka pdiang ia katei ka rai jong utei u nongialam ba hakhmat jong ka Seng hynrei ka dap pat da ka jingpangnud bad bynnud ban duh noh ia u dkhot uba shitrhem uba ju don lang bad ka Seng ha ka jingtreikam jong ka.
U President u kynnoh ruh ba dei namar ka jingkuman bad ka jingbym don shuh ka jingkitkhlieh jong ki nongmihkhmat ha ka sorkar kaba poi haduh u pud ba ki samla kum u Samla Frederict kim banse ban phaikhmat da katei ka lynti da ka thong ban iada bad pynim ia ka jaidbynriew na ka jingshah taplup ha kiwei pat.
La iathuh ruh ba u samla Frederick ha shwa ba un leit iasoh sha katei ka kynhun kieng atiar, u ju pynpaw barabor ia ka mynsiem ieid jaidbynriew bad kane ka iai bteng wat ha ka jingkhih dawa jong ka Seng ryngkat bad kiwei ki kynhun ban dawa pyntreikam noh ia ka Inner Line Permit ka ain kaban iada ia ka jaidbynriew na ka jingwan rung kyrthlep ki mynder.
Watla ki nongialam jong ka KSU ki iaroh ba ka rai ba la shim da u samla Frederick kadei ka rai rangbah, hynrei na ka liang jong u General Secretary ka KSU, samla Auguster Jyrwa u la iathuh ba ka Seng hi baorh kawei ka la dep bthah ia ki dkhot jong ka ba kim dei satia ban rai kyrkieh ia kano kano ka kam khamtam eh ban shim da katei ka lynti.
Ka KSU kaba dei kawei na ki 13 tylli ki kynhun kiba khih tyngeh ban dawa pyntreikam noh ia ka Inner Line Permit haduh mynta ka dang iai neh skhem ha katei ka nognrim ban iai dawa na ka sorkar ba kadei ban pyntreikam da ka ain kaba pyrkhing ban iada ia ka jaibynriew na ka jingshah taplup ha kiwei pat ki jaidbynriew na sha bar.(SP News)
