Shillong, Risaw 18: Ka Hynñiewtrep Youths’ Council (HYC), lyngba ka Shella Area Unit bad Jatap Unit, ka pynpaw ïa ka jingsngewkhia kaba jur halor ka jingbym ioh um jong ki paidbah nongshong shnong ha Kher Jatap bad Lum-u-Smon lyngba ka Scheme JMM mynta la kumba 4-5 bnai.
Kane ka jingbym ioh um kaba la neh slem ka la buh ia ki paidbah ha ka jingeh kaba khraw ha kaba iadei bad ka jingpynbiang ia ka um dih bad kiwei kiwei ki jingdonkam ba manla ka sngi.
Ka um ka long ka jingdonkam ba kongsan tam ha ka jingim, bad kam dei satia kaba dei ban shah iehnoh ia ki paidbah khlem ka jingpynbiang ĩa kane ka jingdonkam ba kongsan.
Ka HYC ka sngewkhia ba watla la don ka Scheme JMM na ka bynta ban pynbiang um ia ki paidbah, hynrei ki nongshong shnong jong kine ki jaka ki dang hap ban mad ia kane ka jingeh la bun bnai.
Kane ka pynmih ĩa ka jingkylli halor ka jingtreikam bad ka jingpynneh pynsah ĩa ka rukom pynpoi um lyngba katei ka scheme. Namar kata, ngi kyrpad ia phi kumu ophisar ba dei peit ia ka PHE Shella Sub-Division ban shimkhia mardor ïa kane.
Ha ka juh ka por ban pynlong ĩa ka jingjurip ha Kher Jatap bad Lum-u-Smon, khnang ban lap ïa ki daw tynrai jong ka jingbym poi um bad ban pynbeit noh ia ki jingduna kiba la mih.
Ki kyrpad ruh ia phi ban pynthikna ba ka jingpynpoi um kan sdang biang khlem da pynslem shuh, bad lada donkam ia ka por ban pynbeit ĩa ka jingthut, ban pynbiang ĩa ka um da kiwei pat ki lad shipor haduh ban da lah ban pynbeit pura ia ka jingeh.
Ka HYC ka khmih lynti ba phin shim ia kane ka jingeh kum ka kam kyrkieh bad ban ai ka jingpynshai sha ki paidbah halor ki daw jong ka jingthut bad ki sienjam ba la shim ban pynbeit ĩa ka.
Ki kyrmen ba phin leh ĩa kaba donkam khlem da pynslem shuh, khnang ba ki paidbah jong Kher Jatap bad Lum-u-Smon kin lah ban ioh biang ĩa ka um kaba ki donkam ha ka jingim ba manla ka sngi.
