Jowai Jymmang 29: Ka Jaintia Youth Federation JYF Central Body hadien ba ka la ioh ban shong CEC ban iatai bad tih bniah halor ki jingshah kynnoh ba khlem nongrim jong u Nongialam ba hakhmat duh jong ka Seng, da kawei ka jingmut ka la shim ia ka rai kaba tyngeh pyrshah ia u Organising Secretary samla (Mr. Esterwis Ryngkhlem) jong ka Seng da kaba weng noh ia u na ka jinglong dkhot bad nongkit kam jong ka JYF halor ka jingpynjah burom ia u President (PL Majaw) kumjuh ia ka seng hi baroh kawei.
Ia kane rai ka JYF ka la shim ha ka CEC kaba lah long ha ka 26th-04-2014 ha office treikam jong ka Seng, ha kaba baroh ki nongialam bad nongkitkam ka seng ki la pynpaw ia ka jingbitar jur ia ka jinglong arsap bad suri kup snieh langbrot u Mr. Esterwis Ryngkhlem uba dei u Ex- Organising Secretary, uba la nud ban shet kylla tang na ka daw ka jingieit sbaium salia ban pynjah burom khlem nongrim ia ka Seng ong u Samla Galacstone Khongshling Vice President ka JYF.
Ha kajuh ka por ka seng ka ong ba ka dei tang ka kput bad ka jingpyntieng pynsmiej ia ki nongialam sengbhalang kiba ieng pyrshah ia ka jingbam sap kiba la ktah jur ia ka roi ka par hapoh ka District bad ka Jylla hi baroh kawei, khamtam ki kup shilliang ki sem shilliang. Na ka liang ka Legal Cell jong ka seng kan shim da kaba tyngeh pyrshah ia ki tei ki nongpharep pynjah burom ia u President ka JYF samla PL Majaw, da kaba kynnoh ba u dawa pisa na u CEM barim ka JHADC u MB Rymbai.
Kum kine ki jingkynnoh bunsien hi ha ka jingiaid lynti kum ki nongialam Sengbhalang kiba trei hok bad trei beit ia ka kam ki bym ju aili ne shah pynbiej ha ki khwan myntoi shimet kin shah kynnoh bad shah pharep beit ha ki ingkhongshyllangmat ki bym don shuh ka rain ka rem ban pyrkhat ia ka burom ka ijot ka long briew ka man briew bynrap shuh shuh u tei u nongialam ka JYF samla Galacstone Khongshling Vice President.
Kumta na ka liang ka JYF ka pynbna ba naduh mynta ka sngi ba ia u Ex- Organising Secretary (Mr. Esterwis Ryngkhlem) ka Seng ka la weng kam bad beh noh shisyndon ia u naduh ka jinglong dkhot hapoh jong ka JYF kaban treikam naduh mynta ka sngi bad ka tarik 29th-May-2014, namar kum kine ki jait briew kiba shim kabu ban rieh tngen hapoh ki Sengbhalang ban pynbiej ia kiba lui lui ki bym don jingnang jingtip kan thaw jingeh shuh shuh ia ka Seng pynkut u kyrwoh na u Vice President.(SP News)
