Shillong Iaiong 11; U Bah Ardent Basaiawmoit mynta ka sngi u la wanrah ia ka Call Attention hapoh ka iing dorbar ban pan jingpynshai na ka sorkar ha kaba ia dei bad ka jingshah siat jong u Jailor ha Willaimnagar ha ka 3th Rymphang mynta u snem.
Ha ka jingkren ka jong u la pan jingshai na ka sorkar ba balei la pynlong soh pdung ia ki khasi kiba trei ha Garo Hills, da kaba ong ia kane na liang jong u Bah Ardent u la ong “ Ngam mud ban wanrah ia kano kano ka jingsngewpherm hynrei ka dei kaba shisha bad kaba la jia” u jer ia ki jingjia da kaba ong ba u DTO u ba la long MLA mynta u la shah rah bor , Ki Engineer jong ka Mehgalaya Electricity Corporation (MeCL) bad kane ka jingjia ha phatok Williamnagar.
U Bah Ardent u la kwah ban tip ba balei la phah jubor ia u Bah Nail Warjri bamkwai ha dwar u blei sha Willaimnagar, kaei ka jingiakren hapdeng u Bah Nail bad u DG Prison shuwa ban leit sha katei ka jaka, hato kadei shisha ne em ba la phah ia u sha Willaimnagar khlem da don ka official order, lane ka don ne em ka jingia dei kane ka jingia ha willaimnagar bad ka jinglaitphet ki briew na Shillong District jail.
Ha ka jingjubab jong ka myntri kam poh iing ka kong Roshan Warjri ka la ong ba ka sorkar ka la shim khia ia kane ka jingjia, ha kato ka juh hi ka sngi mar ia jia ki pulit ki la leit bran bran sha kane ka jaka ban leh ia kaba don kam, la thung ia ka magisterial inquiry ban tohkit ia kane ka jingjia ha kaba na ka liang jong ka kynhun tohkit ka la ai jingmud ruh sha ka sorkar kumno ban leh ba peit ba ha ki sngi ban wan kan nym jia shuh kum kane ka jingjia.
La iathuh ba ka sorkar ka la sanction ia ka pisa shilak tyngka na ka bynta ban ai sha kiba ha iing jong kito kiba la ngat ha katei ka jingjia ba sngewsih.(SP News)
