New Delhi Jymmang 08: Ka kynhun jong ki samla ka North East Students’ Organisation (NESO), mynta ka sngi ki la leit ban ia kynduh ia u myntri rangbah duh jong ka Ri U Dr Manmohan Singh ha iing sah jong u ha Delhi.
Ha kane ka jingiakynduh na ka liang jong ka NESO hapoh ka jingialang jong u Chairman ka seng u Bah Samuel B Jyrwa ki la dawa ba dei ban pynrung ia ki jinghikai kiba ha rukom ha kaba ia dei bad ka jingaikam ai jam ia ki samla pule ha kaba u myntri rangbah duh jong ka ri u la kular ban leh ia kane kaba don kam.
Ha kane ka jingiakynduh na ka liang jong u myntri rangbah duh jong ka Ri India u la ong ba ia ka tand DoNER shen yns a pynduhnoh bad ban wanrah da kaba thymmai bad kaba kham lah ban trei kam.
Haba ia dei bad ka jingwantuid jong ki bar ri na ka liang jong jong u myntri rangbah duh jong ka Ri u la kubur ba kane ka long ka shisha bad la ong ba dei ban wad ia ki bad lada lap ba ki dei ki mynder ri dei ban beh noh ia ki sha ka jaka bad ka ri jong ki, ha ka juh ka por u la ong ba ia ki trai shnong kiba dei ki nong India ym dei ban ktah.
Haba ia dei bad ka ain iakjakor pat na ka liang jong u myntri rangbah ym shym la kular ei ei hynrei u la ong ba yn sa phah ia ka kynhun jong ki MP ban bihsar bniah ia kane ka jingdawa ha kaba ia dei bad ka AFSPA ban lap ia ka jingshisha.
Haba ia dei bad ka jingiakren ia suk bad ki seng lehnoh na ka liang jong u myntri rangbah u angnud ba dei ban pyndep noh ha ka rukom kaba dei bad ka por kaba biang, halor ka jingshna ia ki dam um kiba heh u la ong ba ka NE ka dei ka jaka iaid jongu Jummai ha kaba hap ban jurip bad peit bniah ha kaba ym lah ban ia lehkai bad ka jingim briew.
Haka por myn sngi shuwa ba kin leit ban ia kynduh ia u myntri rangbah duh jong ka Ri India ki nongialam jong ka NESO ki la ia kynduh ia ka kynhun North East MP forum ha kaba u long Chairman U Mukut Mithi, MP, Rajya Sabha, la ia kynduh ia u General Secy., U Bhaishya, MP, Lok Sabha, bah Vincent Pala, MP, Lok Sabha bad ia u Takam Sanjoy, MP, Lok Sabha. Kine ki MP ki la ai ka jingkular ba kin ia kren ia kane ka jingdawa jong ki bad ka sorkar pdeng.(SP News)
