Shillong, Naitung 24: Ka FKJGP Nongkrem Circle hadien ba ka la ioh sngew ia ka jingud jingnam jong ki Paidbah nong shong shnong jong ka thain halor ki jingeh kiba ki iakynduh na ka por sha ka por ha kaba iadei bad ka jinglong jingman ki bor ba dei khmih bad sumar jong ka koit ka khiah lyngba ka jingshakri jong ka Smit P.H.C. Kumta ban lap ia ki jingshisha baroh ka Seng hapoh ka jingialam jong u Samla Wanshan Kharmudai President FKJGP Nongkrem Circle bad u Samla Wadbor Kharmutee Vice-President FKJGP Nongkrem Circle ha ka 23rd July 2013 ka seng ka la hiar ban leit jurip kyndit kyndit ia ka Smit P.H.C. ha katei ka jing leit jurip jong ka seng la lap shisha ba ki don shibun ki jingduna khamtam eh ia ka jingduna palat ki Nongtrei ha katei ka P.H.C.
Ka FKJGP ka kubur ba ym lah ban len ba ki nongtrei kiba don ha katei ka P.H.C. kynthup naduh ki Doctor, Nurses ki la ialeh katlah kat iai ban ai ia ka jing shakri kaba bha tam phewse kam shym la lah satia ban ai ka jinghun kaba pura ia ki paidbah nong shong shnong jong ka thain Nongkrem namar ba ka jingbun briew ha ka thain kala nang kiew na ka por sha ka por bad ia kane la shakhi ba ha katei ka jing leit jurip jong ka seng la shem ba palat 171 ngut ki paidbah kynthup ruh naduh ki shnong kiba marjan kum na Mawkynrew, Jongksha, Umphyrnai, Laitkot, Nongkrem,Mawlyngngad, Mylliem Umiew, Mawpynthih wat naduh ka Shnong Sohryngkam ruh ki la iatuid sha ka Smit P.H.C. ban ioh ia ka jing sumar.
Kaba kham pynnoh mynsiem shuh shuh ia ki Nongialam jong ka Seng ha katei ka sngi ka long ba la lap ba don iwei i longkmie iba thmu ban wan wad jing iarap na katei ka P.H.C. iba la ieng lain naduh ka por 8:00 am hynrei i dang ioh dawai haduh ka por 2:55pm namar ka jing bun briew palat nalor kata la don ruh sa iawei i longkmie tang namar ka jing ioh dawai slem palat i la kem pang kyndit kyndit ha ka por ba i dang ap dawai haduh ba la hap ban pynkit wut wut sha ka kamra Emergency bad ka shim por haduh Shikynta duna ba ki Doctor ki lah ban ai jingiarap ia itei i longkmie namar ba la bun palat ki nong wan shim dawai nalor ba ki don tang 2 ngut ki Doctor.
Kine kim dei shuh ki jing jia kiba dang thymmai hynrei kaba kham sngew sangsot shuh shuh ka long khamtam eh ia ki nongkha nongpun ha ki pot mynmiet myn iong namar ka jingduna palat jong ki Staff Nurse, Ward Boy bad marwei ha ka Labour Room. Kane ka jaka ai jing sumar watla ka dei makna tang ka P.H.C. hynrei ka jing shakri jong ka la long palat ban ia ka C.H.C. namar ki don ki khep ha kaba wat ki Nong wan shim dawai kynthup ruh ia ki Longkmie Longkpa ki hap ban iarap kylla pynban ia ki Doctor bad ki Nurses namar kim lah shah satia ban peit ia ka jing bunkam namar ka jingduna palat ki Nongtrei.
Ki Nongialam jong ka Seng ha katei ka sngi ki la ioh ruh ban iakren bad ki bor pyn iaid jong katei ka P.H.C. ha kaba na ka liang jong ka Dr.C.Majaw ka la pynpaw ba na ka liang jong ki para Nongtrei baroh kila ialeh katba lah ban trei bad ban ai ka jing shakri kaba bha tam ha i bor iba rit katkum ka kam bala bynshet ha ki hynrei ka jingeh ka long ba ki briew kila nangbun katba ki nongtrei pat ki duna. Ka Seng kala ioh ruh ban iakren bad ki riew paidbah kiba wanshim dawai ha katei ka sngi ha kaba na ka liang jong ki paidbah ruh kila pynpaw ia kajuh hi ka sur bad ha kajuh ka por ki ai ruh ka jing iaroh ia baroh ki Nongtrei ha katei ka P.H.C. bad da ka Mynsiem kaba sngewkhia ki la ong ruh ba ki bor sorkar ki la dei ban shimkhia noh mardor ban leh ei ei halor kane ka jingeh kaba ktah ia ka iap ka im jong ki paidbah nongkyndong ban phah kham bun ki nongtrei khnang ba kan long ka jingkyrkhu ia ki paidbah kiba donkam ia ka jing iarap ha ka pang ka shitom.(SP News)
