Shillong, Nailar 13 : U Chief Executive Member (CEM) jongka Jaintia Hills Autonomous District Council (JHADC) u Bah M.B Rymbai u la kular ia ki nongmihkhmat jong ki san tylli ki seng bhalang ban pynsangeh shwa shipor ia ka hukum ba la pynmih da ka Council ban nym shah shuh ia ki nongtrei jongka ban shimti ia ki kam Rangbah Shnong khnang ban ioh bishar bniah biang ia ka kam bad pynmih da kawei pat ka hukum.
Ia kane u CEM u la ong ha ki nongialam jong ki seng bhalang ha ka jingleit ia kynduh ha ka ophis trei kam ka jong u. Kine ki seng balang ki kynthup ia ka JMPF, JSU, JYF,HNPF bad HANM. Haba iakren bad u President ka JMPF u Bah Baitlang Pohsngap u la iathuh, na ka liang ki Seng Bhalang ki la pynpaw ka jingsngew hun halor ka jingkular jong u CEM ban pynsangeh shwa shipor ia ka hukum tad haduh ban da ioh ka jingbishar bniah bad shim ia ka rai da kumwei pat.
Kane ka jingkular u CEM ka long kaba sngew tynnad tangba na ka liang ki Seng Bhalang ki la pynpaw pat ruh ha u ba un bat ia kaei kaba u la kular namar lada um pyntreikam, ki seng ki lah ban iaid pat da kawei ka lad ka lynti kaba lah ban poi sha ki jingiakhih kiba tyngeh ruh.
Dang shen ka JHADC kala pynmih ia ka hukum ba ki nongtrei jongka kim lah shuh ban dang shim kum ki Rangbah Shnong nangne shakhmat kaba dei ka rai kaba la shu shim mardor da ka Council khlem da pan jingmut na ki riew paidbah, ki dorbar shnong ki Raid bad ki seng bhalang lang.Katei ka jingpynmih hukum ba syndet syndet ne kyrkieh jongka Council kala pynbitar ia ki Dorbar Shnong bad kumjuh ruh ia ki Seng Bhalang namar kane kam pat ju jia mynno mynno ruh ha ka histori jongka rilum Jaintia. (SP News)
