Mairang, Jymmang 20: Ka St Joseph Higher Secondary School, Nongkasen kaba la jop haduh 13 tylli ki takma ksiar, 8 tylli ki takma rupa bad 10 tylli ki takma rnong ka la long ka lahduh ha ka Inter School Athletics Meet 2022 jong ka Eastern West Khasi Hills District.
Ia kane ka jingialehkai la pynlong da ka ophis jong ka District Sports Officer, West Khasi Hills District ha ryngkat ka jingiatreilang bad ka Forum For Change and Upliftment of Society (FOCUS) ha Madan Dommawlum, Pyndengumiong, Mairang.
Ka Kynshi Higher Secondary School, Kynshi ka la ioh ia ka nam jop ha ka jingiakhun March Pass Competition katba ka Myriaw RMSA Secondary School, Myriaw ka la jop ia ka khusnam Best Discipline Team.
Ha kane ka sngi, u Lamphang ka Iing Dorbar Thaw Ain ka jylla, U Bah Metbah Lyngdoh u la wan kum u kongsan ha ka jingiadon ryngkat u Superintendent of Police ka Eastern West Khasi Hills District, u Bah M.B Syiem, u Additional Deputy Commissioner ka Eastern West Khasi Hills District, u Bah A. Nongbri, ka District Sports Officer ka West Khasi Hills District, ka Kong B.Syiem, kiwei kiwei pat ki nongtrei sorkar, ki nongialam shnong ka thain, ki nonghikai bad ki khynnah skul.
Haba ai jingkren ha ka jingialang pynkut ia kane ka jingialehkai Athletics kaba lai sngi ia kaba la ioh ban sdang ha ka 18 tarik u Jymmang 2022, u Lamphang ka Iing Dorbar Thaw Ain ka jylla Meghalaya, u Bah Metbah Lyngdoh ula pynpaw ia ka jingkmen ban iohi ia ka jingiashimbynta shitrhem jong ki khynnah pule ka thain bad u la ong ruh ba ki jingialehkai bad jingkilan met.
Kumba long ka jingpule kot, ki long kiba donkam haduh kata namar ki iarap ban pynthanda ia ka jabieng ki khynnah pule bad lyngba ki kam ialehkai, ki khynnah ki lah ruh ban ioh ia shibun ki jinghikai na ka bynta ka jingim ba man ka sngi ka jongki.
Haba kren halor ka ‘No Tobacco Campaign’ kaba long ka campaign jong ki khynnah pule pyrshah ia ka jingdih bad jingbam duma, u Bah Metbah u la pynpaw ia ka jingsngewdiaw halor ka jingkharoi ki kam sniew hapdeng ki samla ka jylla kaba kynthup ia ka jingdih droks.
Ka jingshongkha khynnah bad kumta terter bad u la khot la wer ruh ia ki nonghikai bad ki khynnah pule ka thain ba kin long ki ambassador ki ban trei shitrhem ban iarap pynduhjait ia ki jingsniew kiba kum kine na ka distrik bad ka jylla hi baroh kawei.
