Mairang, Jymmang 11: U shongknor jong ka Meghalaya State Planning Board uba long ruh u MLA ka Mairang Constituency, u Bah Metbah Lyngdoh hynne ka sngi u la ioh ban plie ia ka iing skul kaba thymmai jong ka skul Tirot Sing Memorial Government Upper Primary School, Nongkhlaw.
Ha kane ka sngi la don ryngkat ka jingsakhi lang jong u Deputy Commissioner ka Eastern West Khasi Hills District, u Bah G. Kharmawphlang, u Syiem ka Hima Nongkhlaw, u Pa’iem P.M Syiemlieh, District School Education Officer ka West Khasi Hills District, ka Kong L. Syiemlieh.
U Sub-Divisional School Education Officer ka Eastern West Khasi Hills District, u Bah J. Thyrniang, u Headmaster jong ka skul, u Bah W.Warjri, ki nongialam shnong, ki nonghikai, ki khynnah skul bad ki paidbah ka thain.
Kane ka iing skul kaba thymmai ka kynthup ia ki 5 tylli ki kamra bad la kyrmen ba ka jingplie ia kane ka iingskul kaba thymmai kan pynioh ia ka jaka pule bad hikai kaba kylluid bad kaba paka na ka bynta ki khynnah pule bad ki nonghikai jong kane ka skul.
Haba kren kum u kongsan ha kane ka prokram, u shongknor ka Meghalaya State Planning Board uba long ruh u MLA ka thain, u Bah Metbah Lyngdoh u la ai khublei ia ki dkhot ka Managing Committee jong ka skul khamtam eh ia u Head Master na ka bynta ka jingtrei shitom jongki kaba la wanrah ia u soh bathiang.
Lyngba ka jingioh jong ka skul ia kane ka iing skul kaba thymmai bad u la ong ruh ba dang bun shuh kiwei kiwei ki ba dang dei ban leh kum shibynta ban kyntiew shuhshuh ia kane ka skul bad na ka bynta kata ka donkam ia ka jingiatreilang jong baroh ki nonghikai, ki kmie ki kpa bad ki tnat sorkar, u la ong shuhshuh.
Ha ka jingkren ka jong u, u Bah Metbah u la kren ruh shaphang ka juk stad teknoloji bad u la kyntu ia ki khynnah pule ba kin shim ia kaba bha tam ba ka bor teknoloji ka don ban ai bad ruh ban husiar bad kiar raimaw raidieng na ki jingsniew ba ka teknloji ka wanrah.
U la pynpaw ruh ia ka jingkyrmen ba kane ka iingskul ia kaba la plié ha kane ka sngi kan iarap ban pynjanai shuhshuh ia ka pule dangle ha kane ka skul na ka bynta ka jingmyntoi jong ki nonghikai bad ki khynnah pule kumjuh.
U Deputy Commissioner ka Eastern West Khasi Hills District, u Bah G. Kharmawphlang ha ka jingkren ka jong u kum u symbud kongsan, u la kren halor ka jingdonkam jong ki nonghikai ba kin peitthuh lypa ia ki sap bad talen ba kyrpang jong ki khynnah skul naduh ka por ba ki dang rit khnang ba kin ioh pynjanai shuhshuh iala ki sap ki phong ki jongki.
Hadien habud la ka long ha ka pule puthi ne ki kam ialehkai bad u la kyntu ruh iaki ba kin pynrung ha ka jingmut jong ki khynnah pule ia ka mynsiem iakhun jong u Tirot Sing Syiem uba long ym tang u riewkhraw jong ka jaidbynriew hynrei wat hapoh ka Ri India hi baroh kawei.
Kiwei kiwei pat kiba la kren ha kane ka sngi ki kynthup ia u Syiem ka Hima Nongkhlaw, u Pa’iem P.M Syiemlieh, i District School Education Officer ka West Khasi Hills District, ka Kong L. Syiemlieh, u Sub-Divisional School Education Officer ka Eastern West Khasi Hills District, u Bah J. Thyrniang, u Headmaster jong ka skul, u Bah W.Warjri bad u Sordar jong ka shnong Nongkhlaw, u Bah K. Dkhar.
