Shillong, Risaw 09: Ka District Disaster Management Authority (DDMA), East Khasi Hills District, kala pynlong da ka prokram ai jinghikai iaki nongiashim bynta bad ki nongmihkhmat jong ki kynhun bapher bapher ka Durga Puja Committees ha phyllaw jong ka Meghalaya Bharat Scouts & Guides ha ka jingpynkhreh na ka bynta ka jingrakhe iaka Durga Puja kaban wan.
Kane ka prokram ka thmu ban pynskhem iaka jingshong shngain, jingpynkhreh bad ka jingiarap bad ka jingpynbeit lang ha ki por ba don ki kam kyrkieh ha kane ka jingrakhe.
Kum shi bynta jong kane ka jingsdang, ki pulit pyniaid kali kila pynshai iaki nongiashim bynta halor ka jingpyn biang iaka rukom iaid ki kali bad ka jingshngain ha ki surok, katba ki pulit jong ka Civil Defence kila ai jinghikai halor ka jingpynkhreh ia kano kano ka jingjia ba kyrkieh bad kiwei kiwei.
Ki nongiashim bynta jong ka Aapda Mitra kila pyni da ki rukom iarap kiba donkam ha ka por don ki jingjia ba kyndit bad ki rukom ban iada ialade khnang ba ki nongiashim bynta ki don iaki buit kiba donkam ban ialeh pyrshah ha ki por ba don ki jingjia kyrkieh.
Katei ka jingiashim bynta ba pura jong ki non bad ki nongmihkhmat jong ka Puja Committee kila pynpaw iaka jingkular jong ki ban pynioh iaka jingshong shngain, iaid beit iaid ryntih bad ban lait na kano kano ka jingjia bad sngewsih ha ka jingrakhe iaka Durga Puja ha kane ka nongbah Shillong.
Kane ka pyni iaka jingdonkam jong ka jingiashim bynta jong ka imlang ka sahlang, ka jingshong shngain bad ka jingpynkhreh ha kaban pynioh iaka jingshngain ha ki jaka paidbah ha ka por ba don ki jingialang bakhraw bad ki tamasa bad ki por leh kmen.
