Shillong, Naitung 01: Ka 7 -Shnong Congress Circle ka la ai jingiarap da u khaw sha ki palat 100 tylli ki long iing baduk, te ki shnong kiba ioh pdiang ia une u khaw ki long ka Moolang, Moosniang rim, bad ka shnong Rangad.
Ka party ka ai khublei ia ki paidbah kiba pdiang sngewbha ia kane ka jingai iarap kaba rit jong ka Congress. “Kane ka long tang kum ka jing sdang hynrei dang bun ki issue kiba ngin sa leh ia kane ka thaiñ jong ka 7 shnong ynda la plie kane ka lockdown jong ka covid-19”, ong u Working president jong ka Khliehriat Block Congress Commitee uba dei peit (incharge) ia kane ka 7 Shnong Congress Circle, u Bah Piwell Shylla.
Ka party ka khmih lynti ruh ba da ka jingiarap jong U Blei Nongthaw Nongbuh te kan sa lah ban shakri khambha ia ki paidbah ha ki por ki ban sa wan. Ha kane ka jing sam ia une u khaw te la don ruh ki nongialam jong ka party, naduh u president jong ka Khliehriat Block Congress Commitee, u Bah Deibormi Syad, ki Vice president bad kiwei de ki nongkitkam ba hakhmat jong ka Congress.
Ia kane ka kyrwoh la phah da u General Secretary jong ka 7 Shnong Congress Circle, u Bah Enry Lamurong bad u president u Bah Bangeit Siangshai.
