Shillong, Iaiong 28: Mynta ka sngi ka seng ki nongthoh kot khasi ka Khasi Author Society ka ai khublei ia ka sorkar kaba la ai ka jingithuh ia ka ktien Khasi ban long ka ktien sorkar bad ka jingkhublei ruh kala leit sha baroh ki seng bapher bapher kiba la ai ka jingkyrshan ha kane ka jingialeh ban pynurlong ia ka jingthmu ba ka ktien khasi kan long ka ktien sorkar.
U President ka seng u Dr. D R L Nonglait haba kren ha ki lat pathai khubor la ong ba la ioh ia ka jylla mynta la 54 snem hynrei dei tad haduh mynta ba ka ktien khasi kala ioh ia ka kyrdan ka ktien sorkar kaba pura.
La ong kawei ka sorkar hadien kawei pat, wat la kila dawa ban kyntiew kyrdan ia ka ktien khasi kum ka ktien sorkar lyngba kine ki snem kiba la dep ym shym pat lah ban pynurlong toi bad kim lah khlem da kynmaw ha u snem 2005 lyngba ka Meghalaya State Language Act la pynlong ia ka ktien khasi kum kawei na ka ktien bynrap jong ka sorkar.
Kum ka seng kim shym hun ia kata na kawei ka snem sha kawei pat kila iaid dawa bad dei ha kane kane ka jingdawa kaba tyngeh kaba kila rai ha u bnai Jymmang 2025 ba dei ban pynurlong noh ia kane ka jingdawa da kaba pynshai paidbah khatam ha kine ki bnai kiba la dep kaba kila pyndep ha baroh hynniew tylli ki shnat.
Hadien ba kila leit sha ki paidbah ka sorkar kala sngap bad kala wanrah ia ka Meghalaya State Language Ordinance 2026 bad dei ha ka 27/Iaiong/2026 la ioh ia ka jingmynjur jong u Lat ka jylla la pynmih ha ka jingpynbna sorkar ka Gazette.
