Shillong, Nailar 01: Mynta ka sngi ka KSU kala ioh jingtip ba kila don ki briew kiba wan na sha bar jylla kiba la hiar kali ha Damsait bad shim da ka Local Taxi ban kiew sha Shillong, haba ia dei kane ka KSU kala ioh ia kane ka jingtip ba kila bat noh ia kane ka kali ha Mawlai.
Ka KSU ka kynnoh ba kane ka jingleh jong kine ki briew kiba na bar jylla ban wan kiew sha ka jylla Meghalaya da kaba kyliiang kali ka long ban lait na ka jingshah talasi ha ki pulit, ka KSU Mawlai kala aiti ia kine ki lai ngut ki briew sha Mawlai police station ha ka sngi Saitjian.
Na ka liang jong ka KSU ka ai ka jingmaham ia baroh ki kontrak tor ba kim dei ban wanrah briew na sha bar khlem biang ki kot ki sla Ka jingioh ban bat ia kitei ki barjylla ka dei hadien ka jingioh jingtip kaba bniah ba kitei ki laingut ki barjylla ki wan poi sha Shillong da ka jingphah wan jong uwei u contractor.
Ia kine ki lai ngu ki briew la wan da ka kali Torusit haduh Lad Umsaw ha Umiam, da poi ha katei ka jaka kila kiew noh da ka Taxi kane ka jingleh ka long ban lait na ka jingshah talsi ha ki pulit la kynnoh ka KSU.
Ha ka jingthohkit jongki dkhot jong ka seng la shem ba kitei ki mynder kim shem la biang ki kot ki sla, hadien kane la aiti noh sha ka Mawlai Police Station bad na ka liang ki pulit ki lah pynphai biang ia ki sha Assam ha ryngkat ka jingpynshitom ia kito ki kali ki ba thmu ban pynrung tuh ia kitei ki barjylla.
Kumta lyngba ka kyrwoh ka seng ka sngew ban kyntu jur ia baroh ki contractor ba kin kiar na jing wanrah nongtrei na shabar bad ba ki dei ban ailad shwa ia ki trai ri trai muluk khnang ba kan nym buh jingma ia ka ri bad ka jaitbynriew hi baroh Kawei khamtam ha kum kane ka por Covid-19.
Sa shisien na ka liang jong ka KSU pat lyngba kane ka khubor ka Seng ka pynpaw ba kan nym shong kli kti ban iada ia ka Bri Hynñiewtrep. Shuh shuh ka Seng ka maham tyngeh ruh ia kino kino kiba dang iai ialeh pyrshah khamtam la ki dei ki kali kamai ne ki contractor.
Ka seng kan ym ailad satia bad kan ym bah khlieh lada ka mih kino kino ki jingjia ia ki bar jylla lem bad ia ki kali kamai kiba dang leh beaiñ ia kum kine ki kam kiba buh jingma ia ka Ri ka jaitbynriew bad ka jylla hi baroh kawei.
La pynpaw ba “Ka seng ka dap da ka jingsngewkhia kaba jur haba na ka liang ka sorkar kim shem la suidñiew ia ka jingwanrung tuh ki bar Jylla shapoh kane ka jylla jong ngi. Katba ma ngi pat ki trai Ri, ngi dang iakhun tyngeh ia ka Covid-19 bad ngi dang dawa ia ka aiñ kaba skhem kata ka ILP.
Kane ka sorkar ka lah shu kular kai bad khlem da pynlong Aiñ ia ka MRSSA ka khyrdop ka ban khanglad ia ki bar Jylla.” ka seng kan dang iai pyntreikam hi ka aiñ lajong katba ka sorkar ka dang iaileh ban pynklet ia ki ishu kaba ka seng ka iai dawa. Kane ka long katkum ka kyrwoh kaba la phah da u samla Macdonald Jitem, Publicity Secretary KSU Mawlai Circle.
