Shillong, Jymmang 30: Ka Hynniewtrep Youth Council lyngba ka Education Cell hynne ka sngi ka la pynlong ia ka jingiaid rally, ba ka la ai tip kum ka HYNÑIEWTREP YOUTHS MARCH kaba la sdang na khmat ka office MBOSE bad iaid ter ter ka Lachumier, Barik ha khmat ka Civil hospital shillong, IGP bad haduh da poi ka jaka shong shah thngan u bah Ardent Miller Basawiawmoit ha parking lot ka addl secretariat.
Haba iakren bad u Secretary ka HYC u Bah Roikupar Synrem u la ong, ka seng ka shim ia kane ka sienjam ban pynlong ka jingia iaid paitbah jong ki khun samla ka bri u Hynñiewtrep ha kane ka sngi ka long kum shi bynta ban leit ban ai mynsiem ia u bah Ardent u ba la shim ia ka sienjam ban shong shah thngan ban pynbor ia ka sorkar jylla ba ka por ka la dei ban ioh ia la ka jong ka hok ba dei ban pynbeit thymmai ia ka reservation policy kaba la pyntreikam mynta la 50 snem tam.
“kane ka mat reservation policy ka dei ka bih ba kum ka jaitbyndriew ka la kubum ha ka syntur mynta la kumba 50 snem bad ka ba ka la kylla long ka jingpang ba la bam napoh, haba peit ia ka laitkam ha kine ki sngi haduh katno ngi la shah leh beiñ, haba lait kam ngi iohi ba kiwei ki paralok ki kham ioh bun ka bhah, ngi pat ngi ioh duna” la ong u bah Roikupar Synrem.
U la ong ba kane ka jingpynlong ia kane ka jingiai paitbah ka long ban khot ia ki paralok samla ki ba pule ha kane ka nongbah Shillong.
U la ong ba ka jingwan poi da ki hajar ngut ki khynnah samla pule ha kane ka sngi ka pyni ba ngi don kajuh ka sur kum ka jaitbyndriew ym tang ki longkmie longkmie longkpa hynrei ki khun samla ka jaitbyndriew ki sngewthuh ba kane ka mat ka dei kaba donkam eh bad ngeit skhem ba kane kan pynlong ban ai mynsiem shuh-shuh ia u bah Ardent ban skhem ban nang iaid shakhmat ia kane ka kam bad ban ioh ia la ka jong ka hok katkum ka lynti ba ka jaitbyndriew Hynñiewtrep ka dei hok ban Ioh.
