Shillong, Jylliew 21: U Myntri Rangbahduh Narendra Modi mynta ka sngi u la iashim bynta ha ka jingrakhe kaba 12 ia ka International Day of Yoga (IDY) kaba la pynlong ha ka surok Red Road ba pawnam ha Kolkata, West Bengal.
Ha ka jingialam ia kane ka jingrakhe ha ka ri haph ka phang “Yoga for Healthy Ageing”, u la leh ia ka Common Yoga Protocol ha ryngkat ki hajar ngut ki nongiashim bynta, katba da ki lak ngut ki briew ha kylleng ka India bad ka pyrthei ki la iashim bynta lang ha kane ka jingrakhe.
U Lat ka West Bengal R. N. Ravi, Myntri Rangbah Suvendu Adhikari, Myntri Khynnah (Independent Charge) jong ka Ayush Prataprao Jadhav bad kiwei kiwei ki kynrem ki lyngan ki la iadon lang ha kane ka jingrakhe.
Ha ka jingai jingren ha kane ka jingialang, u Myntri Rangbahduh Narendra Modi u la ai khublei ia ki briew ha kylleng ka India bad ka pyrthei na ka bynta ka International Day of Yoga kaba 12.
U la ong ba ha ka 21 tarik u Jylliew ka la kylla sha kawei na ki jingrakhe ba heh tam ha ka pyrthei, ha kaba ki briew na ki ri bad ki kolshor bapher bapher ki iasnoh kti lang ha ka jingleh ia ka Yoga.
U Myntri Rangbahduh u la ong ba naduh ki lum Himalaya shaduh ka duriaw Indian Ocean bad naduh Bengal shaduh Saurashtra, baroh kawei ka ri ka dap da ka bor jong ka Yoga.
U la ong ba ka don ka bor kaba kyrpang ban pyniasoh ia ki briew, ka imlang sahlang bad ki ri, bad ba ka bteng ban pynkhlain ia ki jingiadei bad ka jingiatylli hapdeng ki briew.
U Myntri Rangbahduh u la ong ba ka jingpynlong ia ka jingrakhe jong ka ri ha West Bengal ka long kaba kyrpang namar ka jingkhlain jong kane ka jylla ha ka jingngeit bad ka jinghiar pateng ka kolshor.
U la kdew sha ki jingnoh synniang jong ki nongialam bad ki riewshemphang kiba iadei bad ka Bengal kum u Swami Vivekananda, Sri Aurobindo bad kiwei kiwei ki riew pawkhmat kiba la iarap ban pynsaphriang ia ka khubor jong ka Yoga sha ka pyrthei.
U la ong ba kane ka jaka ka la sumar ia ki dustur kiba ban jur ia ka jingiatylli ha ka jingmut jingpyrkhat, ka met bad ka mynsiem. U la ong ba ka jingialeh Yoga lang ha Kolkata ka dei ka dak jong kane.
Ha kaba iadei bad ka phang jong ka International Day of Yoga 2026 “Yoga for Healthy Ageing’, u Myntri Rangbahduh Modi u la ong ba ka Yoga kam dei tang ka jingkilan met kaba iahap bad tang katto katne ka rta, hynrei ka dei ka rukom im kaba bniah kaba kyntiew ïa ka jingkhlain, ka jinglah ban ïakhun bad ka koit ka khiah ha man la ki bynta jong ka jingim.
U la ong ba ka Yoga ka ai lad ia ki briew shimet ban long kiba koit ba khiah, kiba smat bad kiba khlain katba ki nang san, katba ka iarap ia ki ban pynneh ia ka jingjem met, ka jinglong ryntih ha ka jingmut jingpyrkhat bad ka jinglong ba khlain ha ka jingsngew.
U Myntri Rangbahduh u la ong ba ka Yoga ka hikai shaphang ka jingdonkam jong ka jinglong ryntih ha baroh ki liang jong ka jingim. Ha kaba ïadei bad ki jinghikai jong ka Bhagavad Gita, u la ong ba ki jinglong kiba ryntih, ki kam kiba ïahap bad ka jingim kaba ïahap ki long ka nongrim jong ka bha ka miat.
U la ong ba bun na ki jingeh kiba ka imlang sahlang jong kane ka juk ka iakynduh ki mih na ka jingbym iahap ha ka rukom im, bad ka Yoga ka ai ia ka lad na ka bynta ka jingiatylli, ka jinglong ryntih bad ka jingsuk ha ka mynsiem.
U Modi u la ban jur halor ka jinglong ba pura jong ka Yoga, ha kaba u la ong ba ki jingmyntoi jong ka kim sahkut tang ha ka koit ka khiah ha ka met hynrei ka iarap ruh ia ka koit ka khiah ha ka bor pyrkhat bad ka jingryntih ka ka jingsngew.
U la ong ba ka Yoga ka kyntiew ia ka jingsngewthuh ialade, ka pynduna ia ka jingkhuslai bad ka wanrah ia ka imlang sahlang kaba kham suk bad kaba iatylli.
U Myntri Rangbahduh u la bynrap ba katba ka Yoga ka pynriewspah ïa ka jingim shimet, ka long ruh kum ka bor kaba khlaiñ ban kyntiew ïa ka jingïasngewthuh jingmut, ka jingïatreilang bad ka jingsuk ha kylleng ka pyrthei.
Haba kyntu ia ki nongshong shnong ban pynlong ia ka Yoga kum ka bynta kaba kongsan jong ka jingim ba man ka sngi, u Myntri Rangbahduh u la kyntu ia ki briew ba kim dei ban buh kynmaw ia ka Yoga tang ha kawei ka sngi ban rakhe.
U la pynpaw ia ka jingthmu “Yoga 365” bad ka prokram Yoga online kaba 100 sngi kaba la sdang mynta u snem, kaba la sakhi ia ka jingiashim bynta na palat 30 lak ngut ki briew na 130 tylli ki ri.
U la pynpaw ïa ka jingngeit skhem ba ka jingpdiang kaba kham iar ïa ka Yoga kan ïarap ban ioh ia ka imlang sahlang kaba koit ba khiah, kaba khlaiñ bad kaba lah ban shaniah ha lade, bad u la pynkut ia kane ka jingkren da ka jingduwai, “Sarve Bhavantu Sukhinah, Sarve Santu Niramayah”.
U Myntri Rangbah ka Jylla u Suvendu Adhikari u la pdiang burom ïa u Myntri Rangbahduh ka ri u Narendra Modi bad kiwei kiwei ki kynrem ki lyndan ha Kolkata bad u la pynpaw ia ka jingsngewnguh halor ka jingjied ïa ka West Bengal kum ka jaka ban pynlong ïa ka jingrakhe paidbah ïa ka International Day of Yoga kaba 12.
U la ong ba kane ka jingïalang ka la wanrah ïa ka jingkmen kaba khlem pat ju don mynno mynno ha kylleng ka Jylla, ha kaba ki briew na baroh ki District, naduh Darjeeling haduh Digha bad Cooch Behar, ki la ïashim bynta ha ki kam Yoga bad ki jingrakhe.
U la kdew ba bun bah ki nongshong shnong ki la ïashim bynta ha kane ka jingrakhe ha Kolkata bad ha kylleng ka West Bengal, kaba pyni ïa ka jingpdiang kaba nangroi ïa ka Yoga kum ka rukom im.
Ha kaba kren shaphang ka jingriewspah ka Bengal ha kaba iadei bad ka jingngeit bad ka jinghiar pateng ka kolshor, u Adhikari u la kdew sha ki jingnoh synniang jong u Swami Vivekananda bad kiwei kiwei ki riew shemphang kiba la ban jur halor ka jingkongsan jong ka Yoga na ka bynta ka bor pyrkhat, ka met bad ka jinglong.
U la ong ba ki nongrim jong ka Yoga ki la suh thied jylliew bha ha ki dustur jong ka India bad ba ki bteng ban ai mynsiem ia ki briew ban don ka jingim kaba ryntih.
U la ai jingsngewnguh ia u Myntri Rangbahduh uba la wanrah ia ka jingrakhe ia ka International Day of Yoga sha Kolkata bad u la pynsngew ia ka ingsngewnguh jong ki briew jong ka West Bengal kiba la ioh ia ka lad ban pynlong ia kane ka prokram kaba kyrpang.
Ha ka jingpdiang ia ka jingialang, u Myntri Khynnah ka Sorkar Pdeng (Independent Charge) uba dei khmih ia ka Ayush Prataprao Jadhav u la ong ba hapoh ka jingialam ba shemphang jong u Myntri Rangbahduh Narendra Modi, ka Yoga ka la kylla shisha sha ka jingiakhih ha kylleng ka pyrthei na ka bynta ka koit ka khiah bad ka bha ka miat.
U la ong ba naduh ka jingpdiang ia ka United Nations resolution halor ka International Day of Yoga ha u snem 2014, ka Yoga mynta ka dei kaba la rakhe ha palat 180 tylli ki ri kaba pyni ia ka jingiahap jong ka ha ka imlang sahlang kaba mynta.
Haba phai sha ka phang mynta u snem, “Yoga for Healthy Ageing “, u Jadhav u la pynpaw ia ka sienjam “Yoga 365” jong ka Tnat Ayush kaba thmu ban pynshlur ia ki nongshong shnong ban pynlong ia ka Yoga kum ka bynta jong ka jingim ba man ka sngi jong ki baroh shi snem.
U la pynpaw ruh ïa ki katto katne ki sienjam ba la shim na ka bynta ka IDY 2026, kynthup ïa ki prokram ai jingtip paidbah kiba heh, ki jingpynshlur ban ïashim bynta lyngba ki lad digital bad ki kam Yoga kiba saindur thymmai.
Haba pynkynmaw biang ïa ka jingangnud jong ka Sorkar ban kyntiew ïa ki rukom sumar tynrai jong ka ri India, u la ong ba ka Tnad Ayush ka trei ban pyniar ïa ka jingïoh ïa ki jingshakri jong ka Ayush bad ban pynkhlain ïa ka kam ka koit ka khiah jong ka ri hapoh ka jingïalam jong u Myntri Rangbahduh ka ri.
Ha kane ka jingrakhe la sakhi ïa ka jingïashim bynta ba shit rhem da ki nongleh Yoga, ki samla pule, ki nongtrei mon sngewbha, ki nongmihkhmat jong ki seng bapher bapher bad ki paidbah ha ka surok Red Road jong ka Kolkata.
Da ki lak ngut ki briew ha kylleng ka ri bad ha kylleng ka pyrthei ruh ki la ïashim bynta ha kane ka jingrakhe lyngba ki jingïalang Yoga, ki jingïalang ha ka imlang sahlang bad ki jaka ba pawnam, kaba pynpaw ïa ka jingsngewtynnad kaba la saphriang bha jong ka Yoga kum ka kam na ka bynta ka koit ka khiah bad ka bha ka miat.
Ki jingrakhe ki sakhi ïa ka jingïashim bynta paidbah kaba ym pat ju jia mynno mynno ruh, ha kaba ki jingpynrung kyrteng ha ka Yoga Sangam Portal ki la tam ïa ki hynriew lak tylli ki seng.
Ka jingiashim bynta kaba jur bha ka pynpaw ia ka jingsngewtynnat jong ki jaka pule, ki shnong ki thaw bad ki nongshong shnong ban pynlong ia ka Yoga kum ka jingiakhih paidbah kaba shisha.
Ka International Day of Yoga 2026 ka dang sakhi ruh ïa ka jingïashim bynta kaba phylla ha kylleng ka pyrthei. Lyngba ka jingïatreilang jong ka Indian Council for Cultural Relations (ICCR), palat 210 tylli ki Mishon jong ka India ki pynlong ïa ki jingrakhe Yoga ha jan 2,500 tylli ki jaka ha kylleng ka pyrthei.
Ka tnad Deiriti, ha ka jingïatreilang bad ka Archaeological Survey of India (ASI), ka la pynlong ruh ïa ki jingleh Yoga ba kyrpang ha ki 100 tylli ki jaka ba pawnam ha ka ri, kiba pynïasoh ïa ka kolshor ba riewspah jong ka India, ki jaka ba pawnam bad ki jingleh Yoga.
