Shillong, Naitung 19: Ka dei ka khubor kaba kmen ia ka All Meghalaya Karate-Do Association ha kaba ar ngut ki nongialehkai kila ioh takma, u samla Daniel Dabiangbha Warjri u la ioh takma ksiar bad Gideon Tympuin la ioh ia ka tkama rynong ha ka jingialehkai 10th Cadet, Junior, U-21 and Senior South Asian Karate Championship 2026 kaba la long ha Bangladesh.
Kane ka jingialehkai kala kut mynta ka sngi ha Dhaka jong ka ri Bangldesh, ka seng €AMKA kala pynpaw ia ka jingsngew kmen ka jong ka ba ki ar ngut ki rangialehkai ka seng kila jop ha kane ka jingialehkai kaba heh duh.
Ka jingshah jied kine ki rangbah ialehkai na kane ka jylla Meghalaya ka long ha dien ba kila jop ia ki jingialehkai kaba la long ha nongbah Delhi kaba la long mynta u snem ha u bnai Rymphang bad Lber 2026.
Kane ka jingjop ka jong ki ha kane ka jingialehkai ka long ka burom ia ka seng namar ka Kynjailin Lyngdoh Mawnai kala ioh takma ha ka jingialehkai kaba la long ha Colombo, ka ri Sri Lanka, ki rangialehkai na Meghalaya kila ioh ruh ban jop ia kane ka jingialehkai ha u snem 2019 ha kaba Wandahunshisha Mawblei la ioh takma ksiar ha katei ka snem.
