Shillong, 28 Nailur 2026: Ka seng Hynniewtrep Youths’ Council (HYC) Nongtrai Unit, East Khasi Hills District, Meghalaya, ha kaba kane ka seng kala ioh bat ia arngut ki briew ha Nongtrai ha ka 26 tarik Nailur 2026, hadien ka jingtip ba la ioh halor ka jingsuba ba kine ki briew kila rung shapoh Meghalaya na Bangladesh lyngba kawei ka jaka kaba don ha khappud.
Kine ki arngut kila thmu ban wan kiew sha Shillong bad hadien kata ban leit sha kiwei pat ki jaka. La buh iaka FIR No. 15(09)2026 ha Mawsynram Police Station halor kane ka jingjia lyngba u Samla Buddien Shabong, Assistant Secretary, Nongtrai Unit.
Katkum ka FIR, kine ki arngut, kiba kyrteng u Jhinuk Hijrani, 22 snem ka rta, bad ka Priyanka Kumari, 20 snem ka rta, la ioh bat iaki bad lap ha ka shnong Nongtrai katba ki dang shong ha ka kali kaba don ia u registration number ML 05 AC 5971. La pynngat mukotduma ia kine baroh arngut hapoh ka Section 12(1)(a) bad (c) jong ka Passport Act, 1967.La aiti iaka jingtohkit halor kane ka jingjia sha Mawsynram Police Station.
Ka HYC Nongtrai Unit ka kyntu iaki bor ba dei khmih ban pynlong iaka jingtohkit kaba bniah, kaba laitluid bad kaba hok, khnang ban pynshisha bad lap iaka jinglong trai ri jong kine ki arngut, ban tohkit iaki kot ki sla jong ki, ban tip iaka lynti kaba kila wan rung bad ban shem la don ne em kano kano ka jingiarap ne jingiatreilang jong kiwei pat ki briew ne ki kynhun kiba lah ban don bynta ha kane ka jingjia.
Ka HYC ka kyntu ruh iaki nongshong shnong, khamtam ia kiba sah ha ki jaka khappud, ban long kiba husiar bad ban pyntip mar mar sha ka thanad jong ki pulit kaba hajan ne sha ki bor ba dei khmih lada ki iohi ia kino kino ki jingwan rungtuh jong ki briew na Bangladesh ne kino kino ki kam kiba i suba, khnang ba ka jingrung beain bad kiwei ki kam pyrshah iaka ain kin lah ban shah khanglad.
