Shillong, Nailur 28: U bah Michael N. Syiem convenor jong ka Maitshaphrang Movement u kyrpad ia ka Meghlaya State Commission for Women ban iarap ban pyntreikam ia ka Meghalaya Compulsory Registration of Marriage Act kaba la pass da ka iing dorbar thaw ain ka jylla ha u snem 2012.
Haba kren ha ki lat pathai khubor mynta ka sngi 28/Nailur/2026 ha Shillong Press Club, u nongkhot ia ka Maitshaphrang Movement balei ka seng ka kyrpad ia ka Commission ka long ba ka sorkar kan pyntreikam ia ka Meghalaya Compulsory Registration of Marriage Act 2012 dei ma ki kiba la kyrpad ia ka sorkar ha u snem 2012 ban shna ia kane ka ain.
U bah Micheal u la ong ba ha kane ka ain ka don ka bynta, kino kino ki kam kiba don ka jingiadei bad ka sorkar ki hap ban pyni ia ka syrnod ba kila iathoh na ka bynta kino kino ki kam kiba iadei bad ka sorkar bad ha kane kajuh ka ain ha ka kyndon kaba lai kala thoh shai biang haba iadei bad kano kano ka kam sorkar hap ban ai ia ka syrnod iathoh shongkurim.
Ha u snem 2016 ka seng kala pan ia ka RTI sha baroh ki tnad sorkar ban lap katno tylli ki tnad sorkar ki pyntreikam ia kane ka ain bad ka jubabd kaba ki ioh kam shym don kawei ruh ka department kaba pyntrei kam ia kane ka ain namar kam don ka jingpynshai ka mut aiu kata haba don kino kino bad ki kam sorkar bad ka ain ka khlem pynshai hi ruh.
Ka sorkar ha u snem 2022 kala wanrah ia ka jingpynkylla ia kane ka ain ban weng noh ia ka jingmut bad ia ka kyndon kaba lai na ka ain ban ong ba donkam ban ai ia ka syrnod iathoh na ka bynta baroh ki kam sorkar, kane ka ain kala long satang ha ka kot ka bym treikam namar ia kine ki kyndon la weng noh haba la pynkylla ia ka.
La iathuh ba mynta ka sngi kila wan ban ia kynduh ia ka Commission ba kan iakren bad ka sorkar ba kan pynshai ka mut aiu kane kaba ki ong ka Official Purpose bad ka sorkar ka dei ban pynshai ban pyndonkam ia ka syrnod iathoh shongkurim na ka bynta kita kita ki kam namar ba la jur palat ka jingiashongkha hi bad haba don ka jingiakhlad ka shitom ba kin ioh ia ka jingiarap.
