Shillong, Lber 31:Ka kynhun ialehkai jong ka Royal Wahingdoh U-17 khur ia ka jingjop pyrshah ia ka Shandong Luneng ka kynhun na China ha ka jingialehkai ba khadduh jong ka Future Champions 2014 ha ka sngi Saitjain ha Gauteng, South Africa.
Ha ka jingialehkai kaba itynnad bad iakhaid bha, ka Wahingdoh ka la pynphai shikol lyngba u Loken Meitei ban pyniakhaid ia ka jingialehkai da 1-1 kol hynrei ha kaba kut ka la pynliem noh ia ka Shandong Luneng ha ka Tie Breaker da 4-3.
Ka Wahingdoh kaba la rah ia ka jingjop ha ka jingialehkai ba khadduh ka la lah ban ialehkai bha ha kane ka lympung ha kaba ka la khur ia ka jingjop ar sien bad iakhaid ar sien bad ka la shah rem noh shisien na ki san sien iakhun.
Kum ban shu pynpaw ka Royal Wahingdoh la lah ruh ban pynliem ia ka Supersport United junior ka kynhun ba khlain kaba la rah ia ka nam laduh ha ka Premier Soccer League.(SP News)
