Shillong, Nailar 28: U Myntri ka tnad ka koit ka khiah u bah Wailadmiki Shylla haba jubad ia ka jingkylli u Dr.Celestine Lyngdoh u la iathuh ba katkum ka jingjurip ka National Family Health Survey-6 ka pyni ba ka jingleit kha khun ha ki jaka sumar ka long 65.6%.
Ka jingiapher hapdeng ka NFHS-5 bad ka NFHS-6 ka long da 12.9% ha ka NFHS-5 ka kaiphod ka kdew 58.1% ha ka NFHS-6 ka long 65.6%, bad ka don ka jingkyrmen ba ha kine ki lai snem ban wan kan kiew sha ka 95% katba ha ka ri baroh kawei ka jingleit kha sha ki jaka sumar ka long 90%.
Haba jubad ia ka jingkylli bynrap u myntri u la ong ba ia mynta ki jaka sumar jong ka sorkar ki don 35 tylli ki CHC,121 tylli ki PHC bad 700 tylli ki Dispensary, ki Referral Unit ki don san tylli, lai tylli dang shna bad sa lai tylli dang bishar bniah ia ki jaka.
Haba phai sha ka jingdon ki doktor la iathuh ba lai tylli ki PHC kim don doktor ban pynkhlain ia ka jingai jingsumar dang shen ka sorkar kala thung 400 ngut ki doktor, bad la thung kontrak 300 ngut ki nos haba phai ia ka jingdon ki doktor specialist ha jylla Meghalaya ka dang duna shaba palat ka jingduna ka long ba ym don doktor.
Ka sorkar kala shim ia ki lad ki lynti ba kumno ban pynsngewthuh ba donkam ban leit kha sha ki jaka sumar ban lait na kano kano ka jingjia ba sngewsih dei halor kane ba la pyntreikam ia ka Mother’s Apps bad kane kala long ka jingkyrkhu bad mynta ka jingleit kha khun sha ki jaka sumar kala poi sha ka 81%, ka jingkhlad ki longkmie kala hiar sha ka 56% bad ki khyllung sha ka 40%.
Haba dei bad ki kali Ambulance ka sorkar ka dang ialeh ban thied thymmai ban pynbiang ha ki CHC haba iadei bad ka jingleit sumar ki longkmie kiba armet ha ka MHIS la mang T.30 hajar/-bad ka sorkar ka pynkit ei ban pynpoi sha ki jaka jingsumar ban leit kha namar ka jingjngai ki lynti syngkien ka sorkar kala shna ia ki jaka sah na ka 23 tylli kiba don mynshuwa mynta kala poi sha ka 85 tylli.
Haba iadei bad ka jingkren u nongialam ka liang pyrshah u Dr. Mukul Sangma u la ong ba balei mynta ki ialeh beit ban shu puid haba leit kha haba iadei bad kane u myntri u la ong ba ka jingpuid ka long tang ia kito kiba don ha ka jingbym khlain hynrei ki ialeh hi ban kiar lada ki longkmie kiba armet ki shait ki khlain.
