Shillong, Nailar, 30: Ki Pulit jong ka East Garo Hills kila ioh jingtip ba saw ngut ki briew kiba kieng atiar ha kawei kali kila hiar sha East Garo Hills District, haba ia dei bad kane ki Pulit kila pynlong ia ka jingiap ktem ha Songsak.U Superintendent of Police, East Garo Hills District, u Pawar Swapnil Vasantrao, IPS u la ong ba ka jingthmu jong ki ban rahbor iaki heh nongtrei jong ka National Highways bad Infrastructure Development Corporation Limited (NHIDCL) na ka bynta ban dawa pisa.
ki pulit kiba la iatreilang bad kaba la ialam da ki heh pulit bad ki pulit jong ka Anti-Terror Squad (ATS) lem bad ki pulit ka East Garo Hills District bad ka Songsak Police Station kiba la leit sha katei ka jaka ban pynlong iaka jinglah ban teh lakam pyrshah ia kiba suba runar.
Katkum ka jingioh jingtip, ka kynhun pulit kala pynlong iaka checking ha checking point ha Songsak Reserve bad ka surok Dagal haduh Songsak ha ka step phyrngab jong ka 30 tarik Nailar 2026. Kumba 4:00 baje mynstep, la don ka kali Bolero kaba don ia u registration nombar AS-01-FD-2889, la iohi ba kala wan tur ha Songsak.
La phah sangeh ia katei ka kali na ka bynta ban checking. Hynrei haba kitei ki briew kiba shong hapoh katei ka kali kila iohi iaki pulit, kila ia siat pyrshah iaka kynhun pulit da kaba pyndonkam da ki tiar ia siat.
Hadien katei, ka kynhun pulit mar mar kala pyrshang ban iada ialade, da kaba ia sait mar kylliang. Ha katei ka jingia siat kuli mar kylliang, ka kali pulit ruh kala julor ha katei ka jingia siat kuli.
Ynda la dep ka jingia siat, la lap hapoh ka kali ba la don saw ngut kiba la mynsaw jur. La rah noh mar mar ia kiba la mynsaw jur sha Songsak PHC na ka bynta ban ioh jingsumar bad la phah rah noh iaki sha Williamnagar Civil Hospital.
Haba la poi ha Williamnagar Civil Hospital, ki doktor kila pynbna ba baroh saw ngut kiba la mynsaw jur, kila khlad noh lypa ha lynti.
La ithuh ia kiba la khlad kum u Allason Marak, ba shong ba sah ha Mendima, kaba hap hapoh North Garo Hills. Une u dei uwei na ki nongsakhi uba dang shen, uba la shem iaka jingjia ia siat ha Damra ha kaba uwei u heh spah u la shah siat iap.
Sa uwei la ithuh kum u Sustom Rabha, ba shong ba sah ha Goalpara, Assam. Katba ia une pat la tip ia u ba u la donkti ha ki kam sniew kynthup iaka mukotduma ba la dep registar ha kylleng ka jylla Assam bad Meghalaya, kumjuh ruh ha Dudhnoi, Mendipathar bad Dadenggre Police Stations, kynthup ruh iaki kam runar kiba iadei bad ka jinglute, rahbor bad kiwei kiwei ki kam runar ba hapoh ka kyndon Arms Act.
U Kalam Ali, uba na Goalpara, Assam, uba dei ba donkti bad ka Krishnai PS Case kaba hap hapoh ki kyndon jong ka jingrahbor, kam dawa pisa bad kiwei kiwei ki kam runar.
U Bobidul Islam, uba sah ha Goalpara, Assam.
Na ka bynta ka jingtip, la ong ba la lap ia ar tylli ki tiar siat pistol na kine kiba khlad, lem bad kiwei ki tiar siat kiba kila pyndonkam ha ka por ba ia siat mar kylliang bad ka kynhun ki pulit. Kawei ka pistol kaba la lap dei kaba la thoh “Beretta”. Kawei pat kaba don ki dak thoh bym lah ban pule.
La pynlong iaka jingtohkit kaba dang iaid shakhmat bad yn sa leh katkum ka ain. Ki rukom long rukom man kiba la ialam sha ka jingia siat, ki tiar siat bad ki kuli kiba la ioh kurup bad kiwei ki jingshisha kiba iadei ki dang don hapdeng ka jingpeit bniah kaba ryntih ban tohkit.
La kyntu ia u paidbah ban nym pynsaphriang iaki khubor lamler lane ki khubor thok bad ban nym ngeit iaki thymmei khubor ki bym pat don jingshisha. Ka Meghalaya Police ka barabor ka iai ieng skhem ban pynneh iaka jingshngain u paidbah bad ban iada iaki iing ki sem bad kaba nyngkong bad iaki nongtrei kiba treikam ha kane ka distrik.
