Shillong, Risaw 16: Ka seng Khasi author Society(KAS) kala leit ban ia kynduh ia u Myntri Rangbah ka jylla u Conrad K Sangma mynta ka sngi ban kyntu ia ka sorkar ban pynkylla ktien sorkar ia ka ktien Khasi ha Meghalaya namar kumba ka long mynta ka dang dei tang ka ktien bynrap.
Ha kane ka jingiakynduh ka long ban pynsngew ia ka jingdawa ban pynrung ia ka ktien khasi ha ka khyrngit kaba phra jong ka riti synshar jong ka Ri India bad la iathuh ba dang ha kine ki khyndait sngi ka seng kala pynlong ia ka jingialang bad ia khih ha nongbah Delhi.
Ha katei ka jingiakhih kaba la pynlong ha Delhi kila leit ban ai ia ka dorkhas sha ka ophis jong u myntri rangbah duh ka Ri India u Narendra Modi, myntri kam poh iing u Amit Shah bad sha ka President ka Ri India ka Droupadi Murmu.
Ha kane ka jingiakynduh na ka liang jong ka KAS kala kyntu ia u myntri rangbah ka jylla u Conrad K Sangma ba un but dien ia kane ka jingdawa jong ki bad ban wan rah da ka official Bill ha poh ka Parliament ban kynthup ia ka ktien khasi bad Garo ha ka khyrnit ba Phra jong ka riti synshar ka Ri India.
Haba ia dei bad ka jingdawa ban pynkylla ktien sorkar ia ka ktien Khasi na ka liang jong u myntri rangbah ka jylla u la pynsngew sha ki dkhot jong ka KAS bas a dang peit bniah ia kane ka bynta bad un aiti sha ka tand sorkar ba peit bniah ia ka Meghalaya Language Act 2005.
Ka KAS ka la ban jur ruh ba ka sorkar ka la dei ban wan rah da ka jingpynkylla iaka Meghalaya Language Act, 2005 khnang ban lah ban pynlong ia ka ktien khasi kum ka ktien sorkar hapoh ka jylla Meghalaya bad ka KAS kan sa pynmih ia ka Dikshonnary ha ka khasi ha ka rukom kaba dei.
