Shillong, Nailar 05: Ka Jaintia National Council (JNC) kala ong ba ki pynpaw bad ai ka jingkyrshan ka iaka dorkhat lynnong kaba 15 sngi kaba la tyrwa da ka Khasi Students’ Union (KSU) sha ka sorkar Meghalaya.
Ki phang kiba hakhmat ba la kdew ha kane ka khubor ki long ka jingiakhih pyrshah iaka Public Hearing, ha kaba ka JNC ka pynpaw iaka jingsngewkhia halor ka rukom pyniaid iaka Public Hearing kaba iadei bad ka projek Shree Cement ha Elaka Nongkhlih, East Jaintia Hills, kaba la long ha ka 31 tarik u bnai July, 2026.
La kynnoh ba la don ka jingkhang lad iaki paidbah, ka jingpyndonkam iaka bor bad ki tiar pynmynsaw da ki bor pyniaid bad ka jinghiar thma iaki nongshong shnong bad ki dkhot ka JNC bad ki jingdawa bakhraw hangne ki long ban pyndam noh iaka Public Hearing kaba la long ha ka 31 bnai July, 2026.
Ban thung iaka jingtohkit kaba khlem jingshah shiliang halor kine bad ki jingshah leh bor. Ban pynthikna ba ka sorkar bad ki bor synshar district kin ym pynshitom ne leh bein iaki paidbah ne ki synjuk kiba pynpaw ia la ka hok.
Ban pynthikna ba ki Public Hearing kiban long sa lashai lashi sngi kin long ki bakhuid, ba shai bad ba don ka jingiasnohkti lang jong baroh ki paidbah nongshong shnong.
Ka JNC ka kyntu iaka sorkar Meghalaya, ka Meghalaya State Pollution Control Board bad ka District Administration jong ka East Jaintia Hills ban shim khia kloi ia kine ki mat ban pynthikna iaka hok, ka jingshongsuk bad ka jingiada iaki hok longtrai jong ki riewlum ha Jaintia Hills.
