Shillong, Jylliew 02: Ka jingialang jong ka Executive Committee (EC), Central Body jong ka Hill Farmers Union (HFU) ka la rai ban pynlong ia ka jingialang paidbah halor ka jingot kilo ha ka 8 tarik mynta u bnai ha ka por 10.30 baje mynstep ha Mawkhar Dorbar Hall.
Katkum ka kyrwoh khubor na u President jong ka Hill Farmers Union (HFU) bah Commander Shangpliang u la iathuh ba ka EC ka la shim ia ka rai ban pynlong noh da ka jingialang paidbah halor ka jingbteng ka jingot kilo ha Iewduh bad kiwei ki jaka namar wat hadien ka jingiakynduh bad ki bor sorkar, District council bad kumjuh ruh bad u Syiem hynrei ka jingot kilo ka dang bteng haduh mynta.
Ka jingot kilo ka la ktah shibun ia ki nongrep namar haduh mynta ka sngi ruh ka dang bteng. Ka EC ka la pynpaw ba ka jingot kilo ka dei ban duh noh namar ka long kum ka jingpang kaba lah ruh ban pyniap ia ki nongrep.
Ka seng ka la shim ruh ia ka rai ban bthah ia ki unit ba kin pynlong ia ki jingialang khnang ba kin pyntip halor kane ka jingialang kaba la thmu ban pynlong ha ka 8 tarik. Shuh shuh ka seng ka la shim ruh ia ka rai ba baroh ki nongrep ki shah ktah halor ka jingot kilo bad kiwei kiwei ki jingshah banbein ha iewduh ki dei ban wan sha kane ka jingialang.
Shuh shuh ka seng ka la shim ruh ia ka rai ban kyrpad ia ki nongrep ba kim dei ban leit die jhur ha katei ka sngi kata ha ka 8 tarik, hynrei ba kin leit iashim bynta ha kane ka jingialang khnang ban pyni ia ka jingiatylli jong ki nongrep.
“Ka por ka la dei iangi ki nongrep ba ngin iatylli da kawei ka sur ngin pynsawa bad ngi dei ban mih paidbah ha ka 8 tarik mynta u bnai dei tang ki paidbah bad ka sur jong ki nongrep ba ngi lah ban pynduh noh ia ka jingot kilo” la ong shuh shuh u bah Commander Shangpliang president ka HFU.
