Shillong, Naiwieng, 14: U Lamphang ka iing dorbar thawain, u Thomas A. Sangma, lem bad ki nongthaw ain ba pawkhmat jong ka jylla Meghalaya bad ki heh nongtrei, kila leit sha ka iingsah jong u Dr. B. R. Ambedkar kaba don ha King Henry Road, England ha ka 11/Naiwieng/, kum shi bynta jong ka prokram ba dang bteng, ka State Legislators’ Executive Leadership Programme ha London bad Cambridge.
Katba kine ki nongthaw ain ki kynthup ia u MLA bad u Lamphang barim, u Abu T. Mondal, u Deputy Chief Whip, u bah Ronnie V. Lyngdoh, u MLA, u Dr. Mizannur Rahman Kazi bad u Stephen Anurag Prathipati, ba dei u NISG Project Officer bad Co-Lead jong ka Meghalaya Legislative Research Forum (MLRF).
Ha katei ka jingleit jong ki ka pynioh iaka lad ban pyrkhat lang shaphang ka jingkynmaw kyrpang kaba neh jong une u nongthoh kot ba hakhmat jong ka ain synshar khadar ka Ri India, u Dr. B. R. Ambedkar bad ka jingdonkam jong u ban kyntiew iaki nongrim jong ka jingiatip mar kylliang, ka hok ha ka imlang ka sahlang, ka burom jong u briew bad ka synshar paidbah ha ka ain.
Kum shi bynta jong kane ka prokram ai jinghikai iaki nongialam, katei ka jingleit kala ailad iaki MLA ban ioh ka jingiohi jngai jong u Dr. Ambedkar khamtam halor ka jingdonkam jong ka pule puthi, ka synshar khadar kaba kynthup lang ia baroh bad ka jingialam kaba don nongrim ban pynkhlain iaki tnad synshar paidbah bad ka jingshakri ia u paidbah.
