Shillong, Jylliew 30: Mynta ka sngi 30/Jylliew/2026 ka kabinet ha ka jingialang kala shim ia ka rai ban pyntreikam ia ka skhim Viksit Bharat – Guarantee for Rozgar and Ajeevika Mission ha Meghalaya.
U myntri rangbah ka jylla u Conrad K.Sangma haba kren ha ki lat pathai khubor la iathuh ba kane ka ain VB-G RAM G ka dei ka ain jong ka sorkar pdeng kaba la bujli ia ka MGNREGA ia kaba la donkam ban pdiang da ka sorkar ia ka ban pyntreikam ia ka ha ka jylla.
U myntri rangbah u la pynshai ba ia ka jingpyntreikam ia ka skhim Mahatma Gandhi National Rural Employment Gaurantee Act naduh u bnai Iaiong haduh mynta u bnai Jylliew kala kut mynta ka sngi bad ia ki skhim bala pyntrei ha kine ki bnai ba la dep la bud ryntih katkum ki kyndon jong ka ain barim.
Ka jingshim ka Kabinet ban pdiang ia kane ka ain kaba thymmai mynta ka sngi ka dei ba ia kane ka ka skhim thymmai kan sdang ban pyntreikam naduh ka 1/Naitung/2026 da kaba pyntreikam ia kane ka jingioh bylla kam dei shuh 100 sngi hynrei kan long noh 125 sngi.
U myntri rangbah u la iathuh ba ha kane ka skhim kaba thymmai lah ban pyntrei kam kumba 300 tylli ki jait kam bad na ka bynta kine ki khyndai bnai ban wan ka sorkar pdeng kala mang pisa T.1100 klur na ka bynta ki kyndai bnai ban wan ka jingbei pisa na ka bynta kine ki skhim kan long ha ka bhah 90% na ka sorkar pdeng bad 10% na ka sorkar jylla bad lada ki jingtrei ki palat ia kata ka hap ban bei hi ka sorkar jylla.
