Shillong, Nohprah 30: Mynta ka sngi u President ka UDP u bah Metbah Lyngdoh u la pynbna paidbah sa 9 ngut ki kyrtong jong ka party ban ia khun ia ka MDC elekshon sha ki ar tylli ki iing dorbar KHADC bad JHADC.
Haba krens ha kane ka jingpynbna ia ki kyrtong la ong ba u khmih lynti ba baroh ki kyrtong kiba la pynbna mynta ka sngi kin poi sha ka thong jong ka jingjop ha kane ka MDC elekshon ban long ha u 21/Rymphang/2025.
Ha kane ka jingpynbna kyrteng 6 ngut ki dei na ka bynta ka JHADC, na War East bah Medling M Swer, na War Central bah Kat Kassar, na War West bah Shlur Lamin, na Mynsngat Khanduli bah Damian S War, na Nartiang Wahiajer bah Rimilanki Synnah bad na Musniang Rangad bah Wailad Siangshai.
Ki lai ngut ki kyrtong kiba la pynbna ki ban ia khun ia ka MDC elekshon sha KHADC ki long u bah Suly Lyngdoh na Mawsynram, bah Gilbert Laloo na Mylliem bad u bah Ryngkatlang Lyndem na Langkyrdem Laitkroh.
Ha kane ka sngi la don lang ruh ki nongkitkam jong ka party u Dr. Jemino Mawthoh General Secretary , u bah Olan Suin MLA, bad kiwei kiwei ki nongkit kam kiba ha khmat jong ka party kila ia don lang.
