Shillong, Jylliew, 11: U James PK Sangma na ka National People’s Party (NPP), uba dei u kyrtong iamon lang kum u MP sha Rajya Sabha na ka kynhun Meghalaya Democratic Alliance mynta ka sngi u Secretary ka Meghalaya Legislative Assembly u Malthus S. Sangma uba dei u Returning Officer na ka bynta kane ka elekshon Rajya Sabha u la pynbna ba u kyrtong ba la pynieng da ka MDA u la jop khlem da don ba ialeh pyrshah.
Ha kane ka sngi, haba la kut ka por ban weng na ka lympung iakhun ia ka elekshon sha Rajya Sabha kaba sah ka dei jong u James PK Sangma namar ba ym don da kiwei pat u Returning Officer u la pynbna ban ai ia ka syrnod sha u James ba u la shah jied kum u MP sha Rajya Sabha na ka bynta ki hynriew snem na ka jylla Meghalaya.
Haba kren ha ki lad pathai khubor, hadien ba la ioh ia ka syrnod kum u MP ka Rajya Sabha, U James PK Sangma u la pynpaw iaka jingsngewnguh ia kane ka jingshaniah ha u kum u nongmihkhmat na ka jylla sha Rajya Sabha bad u la ong ba un pyndep ia ka kamram kaba la bynshet ha u da ka jingkit khlieh iaka kam.
Haba phai ha ka jylla, u la ong ba un iasaid hapoh ka iing dorbar na ka bynta ka jingdonkam ka jylla Meghalaya na ka bynta shatei ka thain lam mihngi jong ka Ri India bad un ialeh ban wanrah ia ki mat iakren hapoh ka iing dorbar na ka bynta kane ka thain baroh kawei.
ki mat ba ha khmat eh kan long khamtam eh ban ioh pynrung ia ka ktien Khasi bad Garo ha ka khyrnit kaba phra ha ka riti synshar ka Ri India bad ban iasaid na ka bynta ban pyntreikam ia ka Inner Line Permit ha Meghalaya namar ia kine, ki ar tylli ki mat, la dep ban pdiang da ka iing dorbar thawain ka jylla.
