Shillong, Risaw 20: U Lat ka jylla Meghalaya u la pynmih da ka jingpynbna iaka Meghalaya Electric Vehicle (EV) Policy, 2026, kaba long ka sienjam kaba khraw ban pynsted iaka jingkylla sha ki kali kiba pyndonkam da ka bording ne kiwei pat ki lad kiba khuid, khnang ban pynduna iaka tdem bad ka jingpynjot iaka mariang. Ka Meghalaya Electric Vehicle Policy 2026 ka dei ka ain kane ka jingthmu jong ka sorkar ban pynsaphriang iaka jingpyndonkam ki kali kiba iada da ka bor ding.
Ha ka juh ka por ka tyrwa ban iarap pisa ban pynshlur ia ki paidbah ban thied kali ban pyndonkam da ka light da kaba ai pisa jingiarap ha ka por thied kali, pynjem lut khajna bad ka jingsiew register kali, ai jingiarap lada pynkylla lane phah pynthymmai iaki kali rim, pynroi iaki jaka charging bording bad pynioh lad iaki nongkhaii lane nongshna kam ban wan pynroi iaka kynja ki kali bording ha kine bad ka jylla Meghalaya.
Kane ka polisi ka thmu ban seng iaka rukom treikam kaba bniah kaba iadei bad ki kali bording kaba kyrshan iaka jingneh jong ka mariang, ban pynduna iaka jingshaniah ha ki bor bording ba mih na ki mar kiba kylla na ka khyndew, pynbha iaka lyer ba ngi ring mynsiem bad thaw iaki lad seng kam lajong, ka jingpynlut pisa da ki riew shimet bad ka jingpynmih kam pynmih jam.
Katkum kane ka polisi, ka ong ba ka jylla Meghalaya ka don 6.53 lak tylli ki kali ba la dep registar tad haduh u Jylliew 2026, kynthup haduh 2,500 tylli ki kali bording. Lem bad ki kali ba kit iaki paidbah nongleit nongwan kiba long ki kali ba nyngkong na ka bynta jong ki paidbah, kaba ka sorkar jylla ka thmu ban pynkylla noh sha ki kali bording ha baroh ki kali shimet bad ki kali ba kit iaki paidbah nongleit nongwan, ki kali paidbah, kali kit iaki nong jngoh kai pyrthei bad kiwei kiwei.
Kane ka polisi ba thymmai ka dei kaba la tei hapoh ka jingpyn skhem ba la pynmih da ka Meghalaya Electric Vehicle Policy, 2021 bad thmu ban pynskhem iaka jingpynmih iaki kali bording lane ki EV lyngba ki jingiarap ba iadei bad ka pisa khajna, ka jingpynbiang bad pynheh iaki mar mot bad iing sem, ka jingkyrshan na ki tnad sorkar bad ka seng pyniaid bad ka jingiasnohkti lang bad ki kynhun shimet. Kane kan neh ha ka bor haduh lai snem naduh ba la pynmih ia kane ka jingpynbna ha ka Official Gazette bad kan bujli noh iaka polisi jong u snem 2021.
Katba iaka jingthied iaki kali ba la iarap pisa dei ki kali ar shaka, lai shaka, bad saw, katkum ki kyndon kiba don, ka jingbiah pisa bad ki pud ba la buh na ka bynta ki jait kali. Ki jingmyntoi ne ki song jingiarap pisa yn sam ha ka rukom kiba wan khmat kin ioh khmat.
Na ka bynta jong ki kali bording ba ar shaka, kane ka polisi ka buh dor haduh T. 1.75 lak. Katba iaki kali shimet bad kali kamai, la buh la ka jong ka dor lem bad ka jingpynbna ban buh pud ym bit palat 2,000 tylli ki kali na ka bynta kawei pa kawei ka jait.
Iaki kali bording ba lai shaka, kynthup iaki kali bording ba dei ki auto-rickshaw bad ki kali kit mar, ki hap hapoh kane kajuh ka polisi. Kane ka bynta ka shah tang 500 tylli ki kali, ryngkat ka jingpynshlur ba thmu ban kyntiew iaka jingpyndonkam iaki kali bording ha ki kam khaii bad jingshakri.
Na ka bynta ki kali bording saw shaka, ka thup pynbeit ka pynshong iaka dor ba nyngkong na karkhana haduh T. 35 lak. Ki kali bording saw shaka ba pyndonkam shimet ki lah ban ioh iaka jingiarap haduh T. 25,000, katba ki kali bording saw shaka ba kamai ki lah ban ioh T. 50,000. Kawei pa kawei ka jait kali ka don iaka jingshah iaid tang 3,000 tylli ki kali. Katba iaki bai iarap kin long katkum ki kyndon ba la buh bad ki jingpyn biang kumba la pynmih da ka tnad Transport.
Ka jingpyllait na ka khajna kali bad ka dor phah register. Nalor kata kiba ioh jingiarap pisa ha ka por thied, ki kynja kali bording kiba dei hok ban ioh kiba thied bad pyn registar hapoh Meghalaya ha ka por jong kane ka ain, kin ioh ka jingsiew iaka pisa na ka khajna kali bad na ka dor jong ka register, katkum ki kyndon ba la buh da ka Tnad Transport.
Kawei na ki bynta kiba kongsan jong kane ka polisi ka long ban pyn urlong iaka iing lane ka jaka charge bording bad ki jaka ai bording lane kylliang battery kiba khlain, kiba suk ban poi bad kiba phriang kylleng ha ka Ri-Lum Khasi lane jylla.
Ka tnad Transport kan pyrkhat, pynbeit bad pynsuk iaka jingtei ia kane ryngkat bad kiwei ki tnad bad kynhun ba iadei, kaba kynthup iaka Meghalaya Power Distribution Corporation Limited (MePDCL), tnad jngoh kai pyrthei, tnad ba peit iaka bha ka miat ka sor, Public Works Department, ki dorbar shnong bad kiwei ki nongioh jingmyntoi.
Katba ia kiba aplai na ka bynta ki jaka ba charge bording, ki jaka kylliang battery bad kiwei kiwei ki projek kiba bit ban ioh jingiarap ne jingbit na ka bynta ki kali bording, ki lah ban leit lyngba ka jingpyn treikam jong ka Meghalaya Single Window System kaba treikam lyngba ka Invest Meghalaya Portal. Ka rukom trei ne ka lad ban pynbiang bad pynsuk iaki jingbit, ki syrnod jingbit bad ban iarap iaki nongkit tyngka na ka bynta ki projek kiba bit ban ioh.
Ka sorkar ka don ka hok ban pynkylla iaka policy na ka bynta ka jingbha jong u paidbah, katba ka State Level Committee kan sa pynbeit iaki jingujor bad ki jingiapher jingmut kiba iadei bad ka jingpynshai ne ka jingpynreikam iaka.
Lyngba ka Meghalaya Electric Vehicle Policy, 2026, ka sorkar jylla Meghalaya ka thmu ban pynkloi iaka jingpynkylla sha ki jait jingleit jingleit kiba khuid, ban pynkhlain iaki jingshna pynbiang kiba kyrshan, ban kyntiew iaki karkhana ne rynsan kiba sah shnong bad ban pynneh pynsan iaka jingroi jingsan ka ioh ka kot, khnang ban pynbiang jaka iaka Meghalaya ban kylla long kawei na ki jaka kiba hakhmat tam ha ka jingleit jingleit kaba khuid ha ka thain shatei lam mihngi.
