Jowai Rymphang 21::Ka Jaintia Youth Federation (JYF) Central Body ka pynpaw ia ka
jingpyrshah jong ka ia ka jingpyndonkam bakla da ki heh nongialam jong
ka congress bad ki heh jong ka parti NPP ban leit ialap election da ki
helicopter sha ki katto katne ki jaka ha Ri Khasi bad jaintia,
Ka seng ka pynrem jur ia ka ne ka jingleit ialap election jong kine ki
heh nongialam kiba la pynpaw ia ka jingbym salia shuh ia ki paitbah
nongshong shnong kiba la peit phyla ia ka jingwan jong ki nongialap
bakhraw ha ka ne ka por election wat la ka dei sha ki thain ba long
kyndong tam ruh ki la ialeh shitom ban wan da ki helicopter khnang ba
ka por kan nym sepei bad lait lut na ka sah kut sah block ha shiteng
lynti,
Hynrei na ka liang jong u President ka JYF Central body u ong ka long
kaba sngewsih ban iohi ba ki heh nongialam bad ki nongmih khmat mynta
ki kham noh ka mon tang sha ki ei ki ei kiba long ka jingmyntoi ialade
bad khwan burom ban pyni ia ka jingieit bad jingsngewkhia ia ka kam
ban pynkhlain ia ki parti ba ki don, wat lada ki hap ban pyllut da ki
phew hajar bad phewlak tyngka ruh ki kloi eh ban wan bad ban poi biang
por kumba la buh thik.
Kine ki rongphong kiba tang shipor jong kine parti kan nym lah ban
pynkhraw ia ka Ri bad ka jaitbynriew lada kine hi ki juh ki nongialam
ki ban ialam ia ka Jylla jong ngi namar kumba ngi tip shai ba ki heh
nongialam ki ba dei na seng congress, ki leh aiu ha por ba jia
Langpih, khanduli, psiar,Moolber bad sahsniang ? hato kine ki
nongialam ki don hi ka mon ban wan jngoh ia ki khun ka jylla kiba shem
jingeh bad jing sngewsih ha ka to ka por ia ka jia pud bad ka Assam?
Hato kine ki nongialam ki long lah kloi ban pynlut ban wan da ki
helicopter ban sngewlem bad pynbeit ia u pud u sam bad ki nong Assam
bad international border? Ka ne ka dei tang ka rongphong election jong
kine ki ba buaid bor ban ioh bat ia u lakam ha ka shynshar ka khadar,
U Myntri rangbah ka Ri Manmohan Singh u wan leh aiu shane tang ha kum
ka ne ka por election u smat u stieng ban wan ban ioh pynkhlain ia ka
parti la jong, balei um wan ha ka por ia ka jia pud Meghalaya bad
Assam haba ma u ruh u dei u nongshong shnong jong ka assam para marjan
bad ka Jylla, ha ka jingshisha u dei ban wan tuklar ban ioh pynbeit
noh ia u pud u sam lada u don shisha ka mynsiem jong ka jingkitkhlieh
ia ka Ri India bad ka jingiaid beit iaid ryntih ka shynshar ka khaddar
hapoh ka Ri,
Ka jingwan bad ka jingpyllut jong kine ki heh congress na Delhi shaduh
Meghalaya ka dei beit tang ia ka shuki ban ioh shynshar ym ban kyntiew
ia ka Ri, hato ka jingpyndonkam da ki helicopter ban leit ia lap
election kan wan rah ne em ia ka jingkylla ha ka shynshar ka khaddar
jong ka Jylla? Buh jing kylli u bah Majaw.
Kumta na ka liang u bah Majaw President jong ka JYF u kyntu ia ki
paitbah jong ka Jylla ba ki dei ban husiar bad bishar bniah bha kino
ki kandidet ki ba don ka jingkitkhlieh ia ka Ri bad ka jaitbynriew ha
khmat, ym ia ka shuki ne ka parti ha khmat khnang ba ka hok bad ka por
ba kordor jong ki kan ym lehnoh ei, kan long pynban ka jingkyrkhu bad
ka roi ka par ha baroh kawei ka Jylla pynkut u kyrwoh na u bah Majaw.(SP News)
