Shillong, Jymmang 14: U Myntri rangbah ka jylla u Conrad K Sangma mynta ka sngi u leit ban jngoh ia ka shnong Sanmer ha ka sien kaba nyngkong bad ha kane jingleit u la sam ia ki tiar ialehkai ha kane ka shnong.
Ki tiar jingialehkai kiba u la sam ki long ki jingialehkai Kriket sha ka kynhun ha katei ka shnong ia ka jingialehkai la pynlong da ka Sanmer Sport Social bad Cultural Club, nalor ka Sanmer kiwei kiba la ioh ia ki tiar ialehkai Kriket ki long ka kynhun ialehkai Kriket na Sawmer, Mawklot, Umlyngka bad ka Shiteng ka kynhun ialehkai kriket.
U myntri rangbah ka jylla u la pynpaw ia ka jingsngewkmen ka jong ban ia kynduh ia kine ki khynhun ialehkai bad u la ong ba ka long kaba don kam haduh katta katta ban kyrshan ia ki khun samla, ym tang ha ka jingialehkai hynrei wat ha ki kam tem kam pud.
U myntri rangbah la ong ba u dap ka jingkmen ban iohi ba ki khun samla ki shim khia kano kano ka kam, ha kane ka sngi u la kren ruh ia ki kam kiba ka sorkar ka leh na ka bynta ban kyntiew ia kikam pynroi.
Ha kane ka sngi u myntri rangbah u la sam ruh iaki tundong jingpynsawa, ka jingiarap pisa ia ka Sanmer Sport Club bad ban shna ia ka iing dorbar bad ka jaka pynlang um hapoh katei ka shnong.
U Bah Daniel Thangkhiew, Political Secretary jong u myntri rangbah ka jylla u la ong ba u myntri rangbah ka jylla u don ka jingiadei kaba jan bad ki paidbah da kaba leit kylleng kylleng ban ia kynduh ia ki paidbah jong ka jylla bad dei hangne ba u myntri rangbah ka jylla u sngewthuh ia ki jingeh ki paidbah.
Ha kane ka sngi la don lang ki nongkit kam shnong ki nongialam jong ki kynhun ialehkai bad kiwei kiwei ki riew rangbah na ki shnong ki thaw ha kane ka jingiakynduh bad u myntri rangbah ka jylla ha shnong sanmer.
