Shillong, Risaw 29: U Myntri Khynnah jong ka sorkarpdeng ba dei khmih ia ka Tnad External Affairs and Textile, Pabitra Margherita u la ai jingkren ha ka jingialang ha ka RozgarMela 2024 ba la pynlong mynta ka sngi ban rakhe ia ki jingsdang ba thymmai jong ki hajar ngut ki samla ba dang rung kam thymmai bad ban jur ia ka jingkut jingmut jong ka sorkar na ka bynta ka India kaba seisoh bad kaba lah ban kyrshan dalade.
“Mynta ka sngi kam dei tang ka jingialang,” la ong u Myntri, “Kadei ka jingrakhe ia ka jingkyrmen, ki jingsdang ba thymmai bad ki kabu kiba iar. Kane kadei ka sngi ba ki jingangnud ki sdang ban urlong, bad ka lawei jong ki samla jong ngi ka kham phyrnai shuh shuh.”
U la ban jur halor kumno ka RozgarMela ka pyni ia ka jingialam ba iohijngai jong u Myntri Rangbah duh Narendra Modi, bad ka jingtrei jong u na ka bynta ka Atmanirbhar Bharat ka aibor ia ka jingiaid lynti ka India sha ka roi ka par.
Kum shi bynta kane ka sienjam, la sam palat 51,000 tylli ki shithi thung kam ha kylleng ka ri, kaba la buh ia ki samla ha ki kam bapher bapher ha ki tnad bapher bapher jong ka sorkarpdeng.
“Kane kadei ka jingkular jong u Myntri Rangbah duh jong ngi ban pynthikna ba ym don manomano ba shah iehdien ha ka jingiaid lynti jong ngi sha ka India kaba la kiewshaphrang bad kaba seisoh,” la ong u Myntri.
Ha jylla Meghalaya la sam 207 tylli ki shithi thung kam sha ki samla ba dang rung kam thymmai, ha kaba 191 tylli kidei na ka Tnad Post, 15 tylli na ka Tnad Rel bad 1 ha NIT Meghalaya.
Ha nongbah Shillong, ki samla kiba wan shakhmat na Meghalaya, Manipur, Nagaland, Mizoram, Tripura, bad Assam ki la iadonlang ban rakhe ia une u mawmer, kaba pyni ia ka jingkut jingmut jong ka sorkar ban poi sha man ki jaka jong ka ri, kynthup ka thain shateilammihngi kaba iar bad kaba bun ki jingdon jingem.
Ha ka jingkyntuia ki samla ban trei shitrhem ha ka kam jong ki, u Myntri u la ong, “Kane ka sngi kam dei shaphang ki statistics, kadei shaphang jong phi. Phi dei ki nongrah ktien na ka bynta ka thong jong ka sorkar jong ngi na ka bynta ka India. Ka jinglong hok, ka jingaiti bad ka jingkut jingmut jong phi kin long ka nongrim jong ka jingkiew shaphrang ka ri jong ngi,” u la ong.
Ha ka khubor sha ki kandidet bad kiba haiing jong ki, u Myntri u la ai khublei, bad ong ba kane ka jingialang kadei ka por jong ka jingsngewsarongia ka ri. U la pynshlur ia baroh ban iatreilang ban tei ia ka lawei kaba seisoh, kaba kynthup ia baroh, bad kaba dap da ki kabu ia man u briew jong ka ri.
Ha ka jingiakren bad ki ladpathai khubor hadien ka jingialang, u Margherita u la ong ba kaRozgarMelaka dei ka jingialang kaba kyrpang ba la pynlong ha 40 tylli ki jaka bapher bapher ha India, kynthup hangne ha Meghalaya.
“Nga sngewsarong ban iohi ka jingiadonlang da ki spah ngut ki samla, kiba thrang ban shimti ia ki bynta ba thymmai jong ki. Ka pynkmen ia nga ban iohi ia ki kandidet kiba la pynpaw ka jingsngewnguh ia ki sienjam jong ka sorkar,” u la bynrap.
U la bynrap ruh, “kane ka jingialang kalong ka bym pat juiohimynshuwa, ha kaba la sam palat 51,000 tylli ki shithi thung kam sha ki samla kiba la ioh ia ka jingjop.
Nga kwah ban ong ba ki samla jong ngi ki la shah pynkupbor da kaba sngap ia u Myntri Rangbah Duh, uba la ai jingkren ba ki samla bad kiba haiinghasem, baroh ngi dei kiba nohsynniang sha ka jingtei ia ka ri. U la iaroh ruh ia ki samla jong ngi bad kito kiba iadon bynta ha ki kam Sorkarna ka bynta ka jingkut jingmut jong ki ban iaidshaphrang sha ka Viksit Bharat.”
U Myntri u la pynpaw ka jingsngewnguh jong u halor kane ka jingjop ha kaba u la ong, “Ym tang kum u Myntri hynrei kum u nongshong shnong jong ka ri India, ngasngewsarong ban sakhi ia kane ka jingkiew shaphrang ha ka India kaba thymmai, haba ngi iaidshaphrang ha ka lynti jong ka jingjop.”
Ha kaba iadei bad ka RozgarMela 2024, ka sorkar ka ban biang ia ka jingkular jong ka ban kyrshan, ban ialam lynti bad pynkhreh ia ki samla jong ka ri da ki sap treikam bad ka jinghikai pyntbit, ban tei ia ki briew kiba la kloi ban trei na ka bynta ka ri da ka burom.
Hashuwa kane u Myntri Rangbah duh Narendra Modi u la ai jingkren ha ka RozgarMela bad sam palat 51,000 tylli ki shithi thung kam sha ki samla ba dang rung kam thymmai ha ki tnad sorkar bad ki kynthun lyngba ka videoconferencing.
Ha ka jingai jingkren ha ka jingialang, u Myntri Rangbah duh u la kren shaphang ka jinglehkmen ba kyrpang jong ka Dhanteras bad u la ai ka jingkitbokkitrwiang ha kane ka jinglehkmen.
Ha ka jingkren shaphang ka Diwali mynta u snem ba kan long kaba kham kyrpang, u Myntri Rangbah duh u la ong ba kadei ka Diwali ba nyngkong naduh ba la pynshong ia u BleiShri Ram ha ka temple ba khraw jong u ha Ayodhyahadien 500 snem.
U la ong ba ki pateng ba bun ki la ap ia kane ka Diwali, katba ki bun kiba la aiti ia la ka jingim na ka bynta kane lane kiba la mad shibun ki jingeh. U Myntri Rangbah duh u la ban jur ba ka pateng ba mynta kalong shisha kaba donbok ban sakhi bad ban iadon bynta ha kum kine ki jinglehkmen.
Ha ka aiomlehkmen, u Myntri Rangbah duh u la ong 51,000 ngut ki samla ki la iohpdiangia ki shithi rung kam ha ki kam sorkar. U la ai khubleiia kine ki samla bad kitbokkitrwiang ruh ia ki.
U Myntri Rangbah duh u la ong ba ka jingai ki kam Sorkar ba la pynskhemia ki lak ngut ki samla ka dei ka kam kaba dang bteng. U la bynrap ba da ki lak ngut ki samla ki la iohpdiangia ki shithi rung kam wat ha ki jylla ba synshar ka BJP bad ki nongiatreilang hapoh ka NDA.
U Myntri Rangbah duh u la ban biang ia ka jingkut jingmut jong ka sorkar ba ki samla jong ka ri kidei ban ioh kam pura. Haba kren shaphang ki polisi bad ki rai jong ka sorkar kiba ktah ia ka jingplie lad ioh kam, u Myntri Rangbah duh u la kren shaphang ka jingshna ia ki expressway, ki surok bah, ki surok, ki lynti rel, ki kad lieng, ki kad liengsuin, ka jingbuh ia ki fiber cable, ka jingbuh ia ki mobile tower bad ka jingpynheh ia ki karkhana ba thymmai ha baroh ki bynta jong ka ri.
