Shillong, Nailar, 22: Mynta ka sngi ka 22 / Nailar /2026, kala don ka jingialang hapdeng ka sorkar Meghalaya bad Assam ha Koinadhara, State Guest House, ban iakren halor ka jingjia ha ka 19 tarik, kala mih ka jingkulmar ha ka nongbah Shillong na ka jingiaid paidbah ba la pynlong da ka Khasi Students, Union ha ka 19/ Nailar/ 2026.
Ha kane ka jingiakren na ka liang jong ka jylla Meghalaya, la lam khmat da u Symbud Myntri Rangbah ka jylla, u bah Sniawbhalang Dhar bad iaka jylla Assam la lam khmat da u Myntri kabinet, u Atul Bora ha ka jingiadon lang ki ophisar na baroh ar ki jylla.
Kane ka jingiakren ia kaei kaba la mih na ka jingkulmar ha ka 19/ Nailar/ 2026, kala neh haduh lai kynta, ha kane ka jingialang kila iakren sani kumno ban wanrah biang iaka jingiaid beit iaid ryntih ha ka leit ka wan bad ban pynneh iaka shongsuk shongsain.
Haba kren ha ki lad pathai khubor, baroh ar ngut ki Myntri, u Symbud Myntri Rangbah ka jylla Meghalaya u la ong ba la kem iaki lai ngut ki nongialam ka seng KSU, kita ki long u President, u Vice President bad u General Secretary, la kem iaki da kaba pyntreikam iaka ain Meghalaya Maintenance of Public Order Act.
U la ong ha kaba iadei bad katei ka jingjia, la don 15 tylli ki ejahar ba la ujor, haduh mynta la lah ban ithuh ia san ngut kiba la tan durkhmat kiba la donkti ban pynjulor iaki kali Assam ha ka 19/ Nailar/ 2026, ka sorkar Meghalaya kala thaw iaka Special Investigation Team ban wad ia baroh kito ki briew ba la donkti ha ka sngi iaid paidbah ka KSU bad ban pynshitom iaki katkum ka ain.
U Symbud Myntri Rangbah u la ong ba haduh mynta la synran da ki pulit ka jylla Meghalaya haduh 3,770 tylli ki kali ba don ia u nombar Assam ban pynpoi suk iaki sha Assam, la ioh 54 tylli ki phone na ki 175 ngut na ki 22 tylli ki kali shimet bad san tylli ka kali tourist bad ha Control Room la ioh 379 tylli ki phone ia kaba la iarap ban pynpoi suk iaki sha Assam.
Ki kali ba la sahkut kiba don hapdeng 400 ne 500 tylli ha Umiam iaki yn sa ai jingiada ban pynpoi suk iaki sha jylla jong ki hapoh 48 kynta. Ha kane ka jingialang la buh ruh iaki nombar ba lada donkam ban phone ban ioh iaka jingiarap, u Whatsapp nombar +919181014888 bad u Landline Nombar – 0361- 92381511, kine ki nombar kin treikam haduh ban da wan biang ka shongsuk shongsain.
Ha kane ka jingialang, la rai ban don ka Permanent District Level Joint Committee hapdeng u Deputy Commissioner ka Nongpoh bad u Deputy Commissioner ka Kamrup Metropolitant. Nalor kane kan don ruh ka Joint Committee on Tourist Transport ha kaba kin don lang ruh ki dkhot ba pyniaid iaki kali tourist kane ka long ban pynthikna iaka jingiaid beit ki kali hadpeng kine ki ar tylli ki jylla.
Ka sorkar Assam bad ka sorkar Meghalaya kan shim ia baroh ki lad ki lynti ban pynthikna ba kan don ka jingiaid beit ka leit ka wan ki kali hapdeng kine ki ar tylli ki jylla bad la rai ba ki sorkar jylla kin shim iaka jingkitkhlieh ban ai ka jingshngain ia baroh ki kali tourist na ka jylla Assam bad na kiwei ki bynta ka Ri India kiba wan sha Meghalaya.
