Rymphangt 7:Ka Balang Unitarian Jowai kan pynlong iaka jingiaseng ban pynkut noh iaka jingrakhe ba shisnem linter iaka jinngdap 125 snem ka balang. Ka jingiaseng kan iahap ruh bad ka Jingiasengbah ba 113 jong ka Senglang ki Nongmane Wei Blei kaban sdang naduh ka 8 haduh ka 10 tarik u Rymphang 2013.
Ka Jingpyndonburom kan long ha Iingmane ka balang kaba don ha Iawmusiang Jowai bad kumjuh ruh haka Madan Tympang Club, Iawmusiang kaba don marsyndah ka Iingmane ka Balang Unitarian, Jowai. Iaka jingrakhe sngikha ba 125, ka Balang la plie pyndonburom haka 15 tarik u bnai June 2012 ha kaba u Myntri ki kam pule dangle, Dr R.C. Laloo ula long u kongsan bad yn pynkut haka 10 tarik u Rymphang yn kyrkhu khyrdoh iakane ka jingpynkut da I Lis Dyson Jones iba long ka President jong ka General Assembly Unitarian and Free Christian Churches UK.
Ka jingdap 125 snem pura jong ka jingseng iaka Balang Unitarian haka shnong Jowai kaba long ruh ka balang mane wei Blei kaba la seng nyngkong ka ki lum Khasi Jaintia Karbi Anglong ka dei haka 18 tarik u September. Ia kaba la seng da u Hajom Kissor Singh Lyngdoh Nongbri bad ki nongbud jong u, u Mar Sutnga Paslein, u Kat Sohmynting Shylla, ka Men Kurimai Lyngdoh bad ka kong Phareinbon Rani ka long jong u H.K. Singh haka 18 tarik u September 1887 haka shnong Jowai.
Ka Jingrakhe kaba jan shisnem ka kynthup ia ki jingai jingiarap daki health camp, ka jingaisngewbha daka snam, ki prokram kiba ia dei bad ka drok, ka jingpynlong iaka jingeksamin iaki briew ban jurip iaka jingpang bampong Cancer ryngkat bad ka ROKO, ka AIDS bad kiwei kiwei. Haka 15 tarik ka balang kala pynlong ruh iaka jingleit jngoh bad aisngewbha ia ki nongshong phatok haka District Jail ha Jowai bad kumjuh ruh la pynlong iaka jingaibam ia ki khunswet haka jaka ri khunswet ha Tome Memorial bad ka jingai jingsumar ei ia ki khunswet kiba don haka Annie Margaret Barr Children ‘s Village ka jaka ri khunswet ka Balang Unitarian kaba don haka shnong Kharang hapoh ka Mawkynrem Block jong ka East Khasi hills.
Ha kane ka jingiaseng kaba lyngkhuh iaka ka jingpynhap pyrda iaka jingdap 125 snem ka Balang Jowai bad ka Annual Conference jong ka Unitarian Union North East India yn ia don ryngkat ruh ki nongialam jong ka Balang Unitarian bad Universalist na USA u Rev. Gary Smith bad Rev. John Gibbons, na Canada u Rev. Brian Kiely uba long ruh u President ka International Councilof Unitarian and Universalist bad u Rev. David Gyero na ka Balang Unitarian na Romania.(SP News)
