Shillong, Lber 19: Ka kynhun kaba san ngut ba la ialam da u Bah John F Kharshiing, Chairman, Grand Council of Chiefs of Meghalaya, ki la ia kynduh bad don ka jingiasyllok bad u Shri. Rahul Gandhi, MP, Vice President, AICC, ha ka 19th March 2014, por 11.15 Am, hapoh Hotel Pinewood, Shillong, ha ka jingiadon lang u Shri. Luizinho Falerio, former Chief Minister ka jylla Goa, u Bah Vincent H Pala, MP, u Dr DD Lapang, MLA, President MPCC, bad kiwei kiwei ki longheh ha kaba la ioh ban buh ban ai ia ka copy bad ka jingthoh ha kaba iadei bad ka ‘White Paper on Indian States -1950’, kaba la rah hakhmat ka parliament ha u snem 1949 bad 1950, kaba iadei bad ki jingiateh bad ki jingkular jong ki arphewsan Hima Khasi States.
Ha katei ka jingiakren bad jingiasyllok, u Shri John F Kharshiing, Chairman, Grand Council of Chiefs of Meghalaya, u la pdiang sngewbha ia u Shri Rahul Gandhi, MP, ha ka kyrteng jong ki Syiems, Dolloi, Lyngdoh, bad Nokma ia ka jingwan jong u sha Meghalaya, bad la ai khublei ia u ia ka por jong u ban ioh ban ia syllok.
Na ka liang u Bah John F Kharshiing, u la ong ha katei ka jingiasyllok ba ka la dei ka jingiohi jngai ba u Prime Minister (Late) Rajiv Gandhi, uba ha ka por ba u kren hapoh parliament ha ka por ba pynrung ia ka ain panchayat hapoh Parliament ha ka 15th May 1989, u la kren ia ka jingdonkam ban pyllait ia ka jylla Meghalaya, Nagaland, bad Mizoram na katei ka ain panchayat ha kaba u la ong quote “The Bill recognizes that in the three states of North East – Nagaland, Meghalaya and Mizoram – there are traditional systems of self Government, akin to Panchayati Raj, which must be preserved In these three states the Traditional systems will be left undisturbed”
U Bah John F Kharshiing, Chairman, Grand Council of Chiefs of Meghalaya, u la pynpaw ha katei ka jingiasyllok kaba kyrpang ba ka dulir jingiateh bad ki jingiakut, Instrument of Accession and Annexed Agreement of 17 August 1948, kaba la iateh bad ka Sorkar India bad ki Hima Khasi States haduh kine ki sngi ym pat lah ban pyndep ia kitei ki jingiateh kular. U Bah Kharshiing u la ong ha katei ka jingiasyllok ba kan iarap ban pynduna bun ki jingiakhih bad ki jingkynad kiba mih na ka por sha ka por hapoh ka jylla Meghalaya, lada ka Sorkar India kan thaw lad ia ka legislative party-less federal council or regional council kaba khlem liang tang na ka bynta ki Khlieh Nongsynshar Khasi, Jaintia bad Garo hapoh ka Constitution Ri India bad u la kyntu ia u ban shim khia ia kine ki jingkyrpad khamtam haba dang iaid ka jingiakren ban pynbeit thymmai ia ka Sixth Schedule hapdeng ki ADCs, ka Sorkar Jylla bad ki Sorkar Kmie.
La iathuh ia u Shri Rahul Gandhi, MP halor ka jingsynshar tynrai kaba kyrpang kaba khlem liang ha kaba ngi don ka (re-call process) ha kaba u khun u hajar u lah ban weng ia uno uno u Nongsynshar Shnong, Raid, Kur, ne Hima jong ki Syiem, Dolloi, Sirdar, Lyngdoh, Myntri, Basan, Rangbah Shnong, Sordar Shnong Nokma, namar ba kam doi ka jingsynshar san snem (no fixed term) u lapyntip ba ki Nongsynshar ki neh katba ki dang don ka jingshaniah jong ka Dorbar Hima ( State Parliament) .
U Shri. Rahul Gandhi, MP & Vice President, AICC, u la kylli bniah halor ka jing synshar khamtam hapoh Sor bad kumno ki Nongsynshar ki pyniaid la ki dorbar bad u la ong ba ki nongrim jong ki Dorbar ki long kiba baroh kawei ka Ri India ki peit khmih namar ki shong nongrim ha ki mawbyrsiew kiba biang bad ki ia syriem kum ki jingbatai u Mahatma Ghandhi, uba la ang nud ban ioh ia ka Ri India kaba ai bor ha ki paidbah haduh hapoh ki Dorbar Shnong.
Ha katei ka jingiasyllok u Shri. Rahul Gandhi, MP & Vice President, AICC, u la ong ba ka jylla Meghalaya ka dei ka jylla kaba itynad haduh katta katta bad u la kylli bad ia kren halor ka jingbiang ka development ha ki jaka jngoh kai hapoh ka jylla Meghalaya kum sha Sohra bad kiwei kiwei ki jaka.
Ha katei ka jingiasyllok la ioh ruh ban buh ia ka jingthoh halor kitei ki phang kiba kongsan bad u Shri. Rahul Gandhi, MP, u la kular ban shim khia ban buddien halor kitei ki kam baroh .
Kiwei kiba la ia kren bad kiba la don lang ki long u Dr DD Lapang, MLA, President, MPCC, Bah Vincent H Pala, MP, u Paiem Niandro Syiemiong, Syiem of Hima Maharam Syiemship, President, Federation of Khasi States, u Bah Kodin Nongrum, Myntri of Hima Sohra Syiemship, u Bah Elijius Sawian, Executive Member, Hima Sohra Syiemship, u Bah Kephas Langstieh, Myntri of Hima Mylliem Syiemship, bad la ialam da u Bah John F Kharshiing, Chairman, Grand Council of Chiefs of Meghalaya, Chairman, Ka Dorbar Ki Khlieh Nongsynshar Ka Ri Hynniewtrep, & Spokesperson, Federation of Khasi States.(SP News)
