Shillong, Iaiong 17: Ka Jaintia Student Union jong ka shnat Jowai hapoh ka jingialang u President u samla Born Rupon, bad u General Secretary, u samla Rio Pyrtuh kila leit ban ia kynduh ia ka Chief Postmaster jong ka Jowai Post Office halor ka jingkynnoh ba kren tohmet ki nongtrei ia ki paidbah haba ki leit ban shim ia ki tiar.
Ha kane ka jingiakynduh ka JSU kala ong ba kila ioh ia ka jingujor ba ki don ki nongtrei ha post ophis da kaba ki pynkhein ia ka Post Office Act, 2023 bad ka Post Office Rules, 2024, kiba kren ba ki nongtrei ki dei ban kren da ka akor ka burom iaki paidbah haba leit don kam.
Ha kane ka jingiakynduh ka Chief Postmaster kala ong ba kan sa shim khia ia kane ka jingujor bad kan sa bthah da ka jingthoh ha ka ktien phareng, Hindi bad Khasi bad ka ktien Pnar na ka bynta ka bha ka miat jong ki paidbah.
Na ka liang jong ka JSU kala pynpaw ia ka jingsngew kmen bad ki shim ba kane ka jingiakynduh ka long kaba seisoh bad kan long ka jingmyntoi na ka bynta ki paidbah ba bun balang.
