Shillong, Jylliew, 16: Ka seng All Meghalaya Domestic Workers Union (AMDWU) kala rakhe iaka sngi burom ki nongbylla kiba trei ha iing briew kaba la tip kum ka International Domestic Workers Day.
Ka kong Elbina Mary Nongkhlaw ka Vice president ka seng haba kren ha ki lad pathai khubor ha Shillong Press Club ha ka jingiadon lang ki dkhot ka seng kala pynshai ba 80 persen na ki kynthei kiba trei ha iing briew ki iakynduh shibun ki jingeh namar ba ki hap trei bun kynta kim ioh ban shongthait.
Kaba kham pynsngewsih ka long ba ka jingshah hynniew bein ia kiba trei hapoh iing ka long khamtam ia kito kiba dang duna ka pule ka puthi kum ka seng kiba trei ha iing briew ki kwah ban pynduh ia kane ka jingpyniapher para briew ki kwah ba baroh yn ia burom para briew.
Kum ka seng ka la buh iaki jingthoh sha ka sorkar ban ai ka jingiada kaba kyrpang na ka bynta ki nongtrei ha iing briew namar bunsien kiba trei sha iing ki briew ki dei kiba na shabar jong ka jaka trei la kyntu iaka sorkar ba kan phah registar ia kiba trei ha iing briew khnang ba kin ioh ban don hapoh ka seng.
Ka seng kala buh hynniew tylli ki mat kaba kum ki nongtrei iing briew ki donkam ban ioh jingiada, ki die ban ioh ka jingsiew kaba biang katkum ka kam ba ki trei, ka jaka trei kadei ban long kaba shngain haba pang ba shitom dei ban ioh iaka jingsumar ha ki hospital.
Ka seng ka kwah ba la kumno kumno kin ioh iaka sngi shongthait shisien shi taiew bad kadei ban don ruh ka por shongthait hadien ba kila dep trei, kum ki nongtrei ki dei ruh ban ioh iaka jingiarap ha ka por pun por kha, ki dei ruh ban ioh iaka jingiarap bai bam tymmen bad kaba kongsan ban lait na ka shah lehbein bad ka shah thombor.
