Shillong, Naitung 27: Ban wanrah ia ka jingiaid beit iaid ryntih khlem don kano kano ka jingwit ia ka leit ka wan ki kali bad ki briew ka tnad pulit ka East Khasi Hills District kala pynlong ia ka jingkhynra naphang ia ki kali bad ki kali ar shaka kiba pynieng beain ha ki lynti iaid kjat bad harud surok.
Ban iakhun pyrshah ia kane ka jingpynieng beain ha ki jaka bym dei ban ieng ki pulit kila jer kyrteng kum ka Operation Free Flow, kane kam da dei eh tang kata ka jingpyntreikam ia ka ain hynrei ka long ban hikai ia ki briew ba kin sngewthuh hangno ban pynieng kali bad hangno dei ban kiar kane ka long ban wanrah ia ka jingshngain lait noh tang ha ka por ba donkam kyrkieh kum ha ka pang ka shitom ban ioh dawai dashin.
Na ka liang ka Shillong Traffic Police ka kyntu ia baroh ki paidbah nongshong shnong ban iatrei lang bad ban ia kyrshan lang ha kane ka jingialeh ban hikai ia ki briew ban nym pynieng kali pathar ha ki jaka bym dei namar ba ka long kaba donkam ban iabud ryntih ban pynlong ia ka nongbah Shillong kaba shngain ha ba iaid ba ieng bad ka jingiaid kaba khlem don kano kano ka jingpynwit.
Mynta ka sngi ka 27/Naitung/2026 ki pulit ha kylleng kila pyndait klam ia ki kali bad ia ki kali ar shaka kiba la pynieng klumar ha ki jaka iaid kjat ki jaka bym dei ki jaka ieng khamtam eh ha ki bynta jong ka Police Bazar naduh Lad Umsohsun shaduh Khyndailad kumjuh ha ki jaka jong ka Shillong Contonment Board ha them Bijoy ki pulit kila pyndait klam ia ki kali ar shaka kiba pynieng ha ki jaka bym dei ban pynieng.
